យ៉ាងហោចណាស់មនុស្សចំនួន ៧៩ ​នាក់ បានស្លាប់នៅក្នុងទឹកជំនន់ និងការរអិលបាក់ដីដ៏ធំ ដែលបង្កឡើងដោយភ្លៀងធ្លាក់នៅភាគឦសាននៃប្រទេសប្រេស៊ីល ខណៈមនុស្សជាច្រើនផ្សេងទៀតកំពុងបាត់ខ្លួន។ ភ្លៀងធ្លាក់ខ្លាំងបាន និងកំពុងវាយលុករដ្ឋ Pernambuco និងរដ្ឋធានី Recife របស់ប្រទេសប្រេស៊ីល ចាប់តាំងពីថ្ងៃពុធសប្តាហ៍មុន។ អាជ្ញាធររដ្ឋបាននិយាយថា មនុស្សមួយចំនួនធំបានស្លាប់ ឬបាត់ខ្លួន បន្ទាប់ពីផ្ទះរបស់ពួកគេត្រូវបានជន់លិចដោយការរអិលបាក់ដី។ ពួកគេនិយាយថា បុគ្គលិកយោធា និងអ្នកពន្លត់អគ្គីភ័យកំពុងស្វែងរកអ្នកនៅរស់។

ប្រជាជនប្រេស៊ីលក្រីក្រជាច្រើននាក់ បានរស់នៅចង្អៀតជាមួយគ្នានៅលើភ្នំ និងនៅតំបន់ផ្សេងទៀត ដែលទំនងជាការរអិលបាក់ដី។ មនុស្សប្រហែល ៤,០០០ នាក់ បានបាត់បង់ផ្ទះសម្បែងរបស់ពួកគេ ហើយត្រូវបង្ខំឱ្យជម្លៀសចេញពីតំបន់ទាំងនោះ។

ប្រធានាធិបតីប្រេស៊ីលលោក Jair Bolsonaro បាននិយាយថា យោធាត្រូវបានបញ្ជូនទៅទីតាំងរងគ្រោះ ដើម្បីជួយក្នុងកិច្ចខិតខំប្រឹងប្រែងស្វែងរក និងសង្គ្រោះអ្នករស់រាន។ គាត់​និយាយ​ថា​ គាត់​នឹង​ទៅ​មើល​កន្លែង​គ្រោះ​មហន្តរាយ​នៅ​ថ្ងៃ​ចន្ទនេះ។  ជម្រាបដែរថា ប្រទេសប្រេស៊ីលបានញាំញីដោយគ្រោះមហន្តរាយ ទាក់ទងនឹងភ្លៀងតាំងពីឆ្នាំមុនមកម្ល៉េះ។ មនុស្សជាង ២៣០ នាក់ បានស្លាប់នៅក្នុងការរអិលបាក់ដីនៅជិតទីក្រុង Rio de Janeiro ក្នុងខែកុម្ភៈថ្មីៗនេះ៕

អត្ថបទ៖ លីដា
ប្រភព៖ Deutsche Welle