តាមប្រភពព័ត៌មាន yahoo បានអោយដឹងថា កាលពីថ្ងៃអង្គារ ទី១០ ខែមិថុនា កន្លងទៅ ឪពុកម្តាយរបស់បុរសម្នាក់នៅ San Francisco សហរដ្ឋអាមេរិក បានដាក់ពាក្យបណ្តឹងប្រឆាំងនឹងក្រុមហ៊ុន Alibaba Group Holdings ជុំវិញការស្លាប់របស់កូនប្រុសរបស់ខ្លួន ខណៈពេលកំពុងប្រើប្រាស់ម៉ាស៊ីនបោះពុម្ព 3D ដែលបានទិញពីគេហទំព័ររបស់ Alibaba បន្ទាប់មកបានឆាបឆេះនៅក្នុងឆ្នាំ២០២០។ បុរសដែលត្រូវបាត់បង់ជីវិតមានឈ្មោះថា Calvin Yu ហើយឪពុកម្តាយរបស់គាត់បានចោទប្រកាន់ថា Alibaba បានលក់ម៉ាស៊ីនបោះពុម្ពដោយដឹង ឬគួរតែដឹងថាមានបញ្ហា ។ ក្រៅពី Alibaba ឪពុកម្តាយរបស់លោក Yu ក៏បានប្តឹងក្រុមហ៊ុនបច្ចេកវិទ្យាចិន Troncsi Technology ផងដែរ។

ចំពោះខ្លឹមសារ​នៃ​ឯកសារ​ដែល​បាន​ដាក់​ទៅ​តុលាការ​បញ្ជាក់​ថា ក្នុង​ខែ​វិច្ឆិកា ឆ្នាំ ២០១៩ លោក Yu បាន​ទិញ​ម៉ាស៊ីន​បោះពុម្ព 3D សម្រាប់​ប្រើប្រាស់​ក្នុងផ្ទះ និង​យោង​ទៅ​លើ​សេចក្តី​ថ្លែងការណ៍​របស់​មន្ត្រី​ដែល​កំពុង​ស៊ើបអង្កេត​ករណី​អគ្គិភ័យ​នោះ បានអោយដឹងថា មូលហេតុនៃការ​ឆេះ​គឺបណ្តាលមកពី ម៉ាស៊ីន​ព្រីន​ឡើង​កំដៅ​ រហូត​ដល់​ភ្លើង​ឆាបឆេះ​សាឡុង​ក្នុង​ផ្ទះល្វែង​របស់​លោក​ Yu  ហើយ​ក្រោយ​ពេល​កើតហេតុ សព​លោក Yu ត្រូវ​បាន​គេ​រក​ឃើញ​នៅ​ក្នុង​បន្ទប់​នោះផងដែរ៕

អត្ថបទ៖ Bee

ប្រភព៖ yahoo