ចិន៖ យោងតាម​ការ​ចុះ​ផ្សាយ​របស់​សារព័ត៌មាន South China Morning Post កាលពីថ្ងៃ​ទី​៩ ខែ​មិថុនា បង្ហាញពីរឿងរ៉ាវរបស់លោក Chen អាយុ ៤៥ឆ្នាំមកពីខេត្ត Jiangxi ប្រទេសចិន បានរៀបការជាមួយប្រពន្ធរបស់គាត់ឈ្មោះ Yu អស់រយៈពេល ១៦ឆ្នាំ និងមានកូនស្រីចំនួន ៣នាក់ជាមួយគ្នា ប៉ុន្តែថ្ងៃនេះបានជួបរឿងដ៏រន្ធត់មួយធ្វើឱ្យគាត់ស្រក់ទឹកភ្នែកនៅកណ្តាលប៉ុស្តិ៍ទូរទស្សន៍ នៅពេលដែលប្រពន្ធលោកលួចផិតក្បត់ ថែមទាំងទើបតែដឹងថា កូនដែលចិញ្ចឹមតាំងពីតូចមកទាំង៣នាក់មិនជាប់សាច់ឈាមឡើយសូម្បីតែម្នាក់។

លោក Chen បានផ្តល់បទសម្ភាសន៍ដល់កម្មវិធីទូរទស្សន៍មួយថា តាំងពីពេលរៀបការរួច គាត់​ត្រូវ​ទៅ​ធ្វើ​ការ​ឆ្ងាយ​ពី​ផ្ទះដើម្បីរកប្រាក់សម្រាប់គ្រួសារ ហើយ​ប្រពន្ធ​របស់​គាត់​មិន​ដែល​ធ្វើ​ឱ្យ​គាត់​សង្ស័យ​អ្វី​ទាំងអស់​។ ប៉ុន្តែថ្មីៗនេះ នាងចាប់ផ្តើមមិនទទួលទូរស័ព្ទរបស់គាត់ ហើយថែមទាំងមិនលើកពេលគាត់ខលជា​វីដេអូ​ទៀតផង គឺទាល់​តែ​គាត់​ព្យាយាម​តាម​ដាន​នាង​តាម GPS រហូត​រក​ឃើញ​ថា កាលពីថ្ងៃ​ទី​១ ខែ​មីនា ប្រពន្ធ​គាត់​នៅ​សណ្ឋាគារ​មួយ ​ហើយលោក​បាន​លួច​តាមនាងនិង​លួច​ចាំ​នៅ​ឯសណ្ឋាគារ​ខាង​លើ មុនពេលភ្ញាក់ផ្អើលពេលឃើញប្រពន្ធចេញពីសណ្ឋាគារជាមួយបុរសផ្សេង។

លោក Chen ក៏បានរក្សាការសម្ងាត់នេះ ព្រោះ​គាត់​មិន​ចង់​ឲ្យ​ជីវិត​គ្រួសារ​គាត់​ត្រូវបែកបាក់ ប៉ុន្តែគាត់បានបន្តការតាមដានរបស់គាត់ រហូត​ឈានដល់​ការ​ធ្វើ​តេស្ត DNA កូន​ទាំង​បី​នាក់​រហូត​ដល់​ការ​ពិត​ដែល​ធ្វើ​ឲ្យ​គាត់ស្ទើតែបាត់បង់ស្មារតី នៅពេលដែលលទ្ធផលចេញមកបង្ហាញថា កូន​បី​នាក់​ដែល​គាត់​ចិញ្ចឹម​នោះ​មិន​មែន​ជា​កូន​គាត់​ទាល់​តែ​សោះ។ លុះលោក Chen ទ្រាំលែងបាន រហូតដល់គាត់សម្រេចចិត្តសួរការពិតពីមាត់ប្រពន្ធរបស់គាត់ ប៉ុន្តែ​ប្រពន្ធ​របស់​គាត់​ខឹង​គាត់​ខ្លាំង​ណាស់​ មិន​ព្រម​ទាក់ទង​គាត់​ទេ គាត់បានស្វែងរកប្រពន្ធរបស់គាត់គ្រប់ទីកន្លែង ក៏រកមិនឃើញ រហូត​ដល់​ចេញ​មករកតាមរយៈប្រព័ន្ធ​ផ្សព្វផ្សាយថា សូមជួយស្វែងរកគ្រួសារគាត់ផង ដែលលោក Chen ក៏បានសម្រក់ទឹកភ្នែកនិងអារម្មណ៍ដ៏តឹងណែនក្នុងចិត្ត នៅកណ្តាលកម្មវិធីតែម្តង។

លុះកម្មវិធីទូរទស្សន៍អាចទាក់ទងប្រពន្ធរបស់លោក Chen ហើយមានការទូរស័ព្ទចូលដើម្បីជជែកគ្នា ដែលប្រពន្ធរបស់ Chen គឺកញ្ញា Yu មានការមិនពេញចិត្តយ៉ាងខ្លាំងហើយថែមទាំងប្រកែកថានាងមិនបានគិតថាអ្វីដែលនាងកំពុងធ្វើ គឺជាការបោកប្រាស់នោះទេ ហើយ​ស្តីបន្ទោស​ប្តី​ថា​មាន​ចិត្ត​ចង្អៀតដែលគិតចង់លែងលះនឹងនាង ដោយ​សារ​តែ​គាត់​ដឹង​ថា​កូន​ដែល​គាត់​ចិញ្ចឹម​នោះ​មិន​មែន​ជា​កូន​របស់​គាត់​ទេ ទាំងដែលមាន​មនុស្ស​ជា​ច្រើន​បាន​យក​ក្មេង​កំព្រា​ច្រើន​នាក់​មក​ចិញ្ចឹម។ នាងក៏សួរប្តីថា តើលោកមានទំនួលខុសត្រូវខ្លះទេ? គ្រាន់​តែ​ដឹង​ថា​កូន​ទាំង ៣មិន​មែន​ជា​កូន​របស់លោក រឺមិនបានជាប់សាច់ជាប់ឈាមនឹងលោក ចង់ទុកកូនចោល បែបនេះ​មិន​ខុស​ពី​សត្វធាតុ​ទេ។

យ៉ាងណាមិញ ក្រោយពីរឿងរ៉ាវខាងលើត្រូវបានផ្សព្វផ្សាយ បណ្តាលអោយមានការជជែកវែកញែកជាច្រើននៅតាមបណ្តាសង្គមនានាផងដែរ៕

អត្ថបទ៖Bee

ប្រភព៖ scmp