របបយោធាមីយ៉ាន់ម៉ា បានអះអាងជាថ្មីកាលពីថ្ងៃព្រហស្បតិ៍ថា ខ្លួនមានបំណងអនុវត្តការកាត់ទោសប្រហារជីវិត ទៅកាន់មនុស្សចំនួន ៤នាក់ ដែលខ្លួនសម្រេចកាត់ទោសប្រហារជីវិត កាលពីដើមខែនេះ។ ម្នាក់​ក្នុង​ចំណោម​អ្នក​ទាំង ៤ ​គឺ​ជា​សកម្មជន​គាំទ្រ​លទ្ធិប្រជាធិបតេយ្យ ​និង​ជា​អតីត​សមាជិក​សភា​ជាមួយ​គណបក្ស​ ដែល​ដឹកនាំ​ដោយ​លោកស្រី​ អ៊ុងសាន ស៊ូជី។ ការកាត់ទោសនេះត្រូវបានថ្កោលទោសយ៉ាងខ្លាំងដោយអង្គការសហប្រជាជាតិ សហរដ្ឋអាមេរិក និងប្រទេសលោកខាងលិចផ្សេងទៀត។ ឥឡូវនេះ មិន​ទាន់​មាន​កាលបរិច្ឆេទ​នៃ​ការ​ប្រហារ​ជីវិត​ត្រូវ​បាន​គេ​ប្រកាស​នៅ​ឡើយ​ទេ ប៉ុន្តែ​អ្នក​នាំ​ពាក្យ​ក្រុម​ប្រឹក្សា​គ្រប់​គ្រង​យោធា​ បាន​ព្យាយាមលើកឡើងពីភាពត្រឹមត្រូវ​ចំពោះ​ការ​សម្រេច​ចិត្ត​របស់​ខ្លួន ​ចំពេល​មាន​ការ​រិះគន់​យ៉ាងខ្លាំងពី​អន្តរជាតិ។

អ្នកនាំពាក្យក្រុម​ប្រឹក្សា​គ្រប់​គ្រង​យោធាបានអះអាងថា ការញុះញង់របស់ក្រុមគាំទ្រលទ្ធិប្រជាធិបតេយ្យ «បានបណ្តាលឱ្យមនុស្សស្លូតត្រង់ចំនួន ៥០ នាក់ ត្រូវបានគេសម្លាប់» ដោយបន្ថែមថា មីយ៉ាន់ម៉ាមានឯករាជ្យ និងមានអំណាចលើដែនសមត្ថកិច្ចរបស់ខ្លួន។ គួរឱ្យដឹងដែរថា ប្រទេស​មីយ៉ាន់ម៉ា​មាន​ភាព​ចលាចល​ចាប់​តាំង​ពី​យោធា ​ដណ្តើម​បាន​ការ​គ្រប់​គ្រង​ក្នុង​រដ្ឋ​ប្រហារ​កាល​ពី​ឆ្នាំ​មុន។ ក្រុមសិទ្ធិមនុស្សក្នុងស្រុកនិយាយថា មនុស្សជាង ១,៩០០ នាក់ បានស្លាប់ ខណៈដែលរបបយោធាបានបង្ក្រាបការតវ៉ា បន្ទាប់ពីរដ្ឋប្រហារជាបន្ដបន្ទាប់។ ជាមួយគ្នានេះដែរ ក្រុមគាំទ្រលទ្ធិប្រជាធិបតេយ្យប្រដាប់អាវុធដែលប្រឆាំងនឹងយោធា ក៏បានប្តេជ្ញាដែរថា នឹងសងសឹកប្រសិនបើការប្រហារជីវិតត្រូវបានអនុវត្ត ដែលវាបានបង្កើនការភ័យខ្លាចថា ប្រទេសនេះអាចនឹងធ្លាក់ចូលក្នុងភាពចលាចល៕

អត្ថបទ៖ លីដា