យោងតាមការចុះផ្សាយរបស់សារព័ត៌មាន BBC បានឱ្យដឹងថា មេដឹកនាំនៃប្រទេសក្នុងសហភាពអឺរ៉ុបដូចជា៖ បារាំង អាល្លឺម៉ង់ អ៉ីតាលី និងរូម៉ានី បានគាំទ្រការដេញថ្លៃរបស់អ៊ុយក្រែនក្នុងការចូលរួមជាសមាជិកសហភាពអឺរ៉ុប ដោយនិយាយថា ប្រទេសនេះគួរតែត្រូវបានផ្តល់ឋានៈជាបេក្ខភាពភ្លាមៗ។ អធិការបតីអាល្លឺម៉ង់លោក Olaf Scholz បាននិយាយនៅក្នុងសន្និសីទរួមមួយនៅទីក្រុងគៀវថា៖«អ៊ុយក្រែនជាកម្មសិទ្ធិរបស់គ្រួសារអឺរ៉ុប»។ ប៉ុន្តែ​លោក​បាន​បន្ថែម​ថា អ៊ុយក្រែន​នៅ​តែ​ត្រូវ​ការបំពេញ​ តាម​លក្ខខណ្ឌ​នៃ​ការ​ចូល​ជា​សមាជិក​ពេញលេញ។

ទន្ទឹមនឹងនេះ ប្រធានាធិបតីបារាំង លោក Emmanuel Macron ក៏បានសង្កត់ធ្ងន់ដែរថា EU ដែលមានសមាជិក ២៧ ប្រទេស នឹងឈរក្បែរអ៊ុយក្រែនរហូតដល់ជ័យជម្នះរបស់ខ្លួនប្រឆាំងនឹងរុស្ស៊ី។

ប្រធានាធិបតីអ៊ុយក្រែនលោក Volodymyr Zelensky បានពណ៌នាការឈ្លានពានរបស់រុស្ស៊ីថា ជាសង្រ្គាមប្រឆាំងនឹងអឺរ៉ុបរួម ដោយបន្ថែមថា «អាវុធមានប្រសិទ្ធភាពបំផុត» គឺការរួបរួមគ្នា។ គាត់បានអំពាវនាវម្តងទៀត ឱ្យមានការបញ្ជូនអាវុធធុនធ្ងន់បន្ថែមជាបន្ទាន់ ដើម្បីឱ្យអុយក្រែនអាចការពារខ្លួនកាន់តែមានប្រសិទ្ធភាព និងរំដោះទឹកដី ដែលកាន់កាប់ដោយទីក្រុងម៉ូស្គូ ចាប់តាំងពីការចាប់ផ្តើមនៃការលុកលុយនៅថ្ងៃទី២៤ ខែកុម្ភៈ។ នៅព្រឹកថ្ងៃព្រហស្បតិ៍ម្សិលមិញ មេដឹកនាំសហភាពអឺរ៉ុបទាំង ៤នាក់ ក៏បានទៅទស្សនាទីក្រុង Irpin ដែលនៅជិតទីក្រុងគៀវ ដែលកាន់កាប់ដោយរុស្ស៊ីអស់រយៈពេលជាច្រើនសប្តាហ៍មកហើយ៕

អត្ថបទ៖ លីដា
ប្រភព៖ BBC