ចំនួនអ្នកស្លាប់ដោយសារគ្រោះរញ្ជួយដីកាលពីថ្ងៃពុធ នៅអាហ្វហ្គានីស្ថាន បានកើនឡើងលើសពី ១,០០០ នាក់ ខណៈចំនួនអ្នកស្លាប់ត្រូវបានរំពឹងថា នឹងមានការកើនឡើងបន្ថែមទៀត ដោយសារមនុស្សជាច្រើននៅតែជាប់នៅក្រោមអគារដែលដួលរលំ។ ការរញ្ជួយដីកម្រិត ៥.៩ រ៉ិចទ័រ បានកើតឡើងនៅក្នុងទីក្រុង Khost ភាគខាងកើតកាលពីព្រឹកថ្ងៃពុធ ហើយអាជ្ញាធរ​នៅ​ខេត្ត Paktika ដែល​នៅ​ជិត​ខាងបានឱ្យដឹងថា មានពលរដ្ឋចំនួន ១,៥០០ នាក់​ផ្សេង​ទៀត បាន​រង​របួសដោយសារគ្រោះរញ្ជួយដីនេះ។ អ្នកស្រុកម្នាក់បាននិយាយថា៖«ការរញ្ជួយដីបានវាយប្រហារនៅម៉ោងប្រហែល ២:០០ ព្រឹក។ វាគ្រោះថ្នាក់ខ្លាំងណាស់។ យើងបានចាកចេញពីផ្ទះ។ មនុស្សជាច្រើននាក់បានរងរបួស។»

មន្ត្រីជំនួយរបស់អង្គការសហប្រជាជាតិ ប្រចាំប្រទេសអាហ្វហ្គានីស្ថាន បាននិយាយថា យ៉ាងហោចណាស់ផ្ទះចំនួន ២,០០០ ខ្នង ត្រូវបានបំផ្លាញនៅក្នុងតំបន់ ដែលជាធម្មតាគ្រួសារមានសមាជិកពី ៧ ទៅ ៨នាក់។ ក្រុមបុគ្គលិកសង្គ្រោះ បានប្រញាប់ប្រញាល់សង្គ្រោះអ្នកដែលជាប់គាំងក្នុងផ្ទះ ដោយសារភាគច្រើនផ្ទះទាំងនោះធ្វើពីដីឥដ្ឋ ខណៈដែលកិច្ចប្រឹងប្រែងជួយសង្គ្រោះខ្លះទៀត គឺមិនអាចធ្វើទៅបាននោះទេ ព្រោះថាតំប់នោះនៅដាច់ស្រយាលខ្លាំងពេក។ មេដឹកនាំរបស់ប្រទេសនេះ ក៏កំពុងអំពាវនាវទៅដល់សហគមន៍អន្តរជាតិ ដើម្បីឱ្យមានការជួយដល់ពលរដ្ឋរបស់ខ្លួន។ មន្ត្រីអង្គការសហប្រជាជាតិបានបន្ថែមថា ភ្លៀងធ្លាក់ខ្លាំងកំពុងរារាំងប្រតិបត្តិការជួយសង្គ្រោះតាមឧទ្ធម្ភាគចក្រ ហើយការរអិលបាក់ដីក៏ជាក្តីបារម្ភផងដែរ៕

អត្ថបទ៖ លីដា
ប្រភព៖ NHK