ក្រសួង​សុខាភិបាលវៀតណាម​បាន​ស្នើ​ឱ្យមានការ​អនុវត្ត​ពន្ធ​អាករ​សម្រាប់​ភេសជ្ជៈ​ផ្អែម​ទាំងអស់ ដើម្បីឱ្យស្របតាម​ការណែនាំរបស់​អង្គការ​សុខភាព​ពិភពលោក នេះបើតាមការចុះផ្សាយរបស់សារព័ត៌មាន VNExpress។ ក្នុងកិច្ចប្រជុំស្តីពីផលប៉ះពាល់នៃភេសជ្ជៈផ្អែមលើសុខភាព កាលពីថ្ងៃព្រហស្បតិ៍ លោកស្រី Tran Thi Trang អនុប្រធាននាយកដ្ឋាននីតិកម្មនៃក្រសួងសុខាភិបាល បាននិយាយថា ក្រសួងកំពុងស្នើឱ្យអនុវត្តការយកពន្ធគយ ដោយផ្អែកលើបរិមាណជាតិស្ករនៅក្នុង ១០០ មីលីលីត្រទឹក។ ការ​ស្នើ​នេះត្រូវបាន​ធ្វើ​ឡើង​ ខណៈ​ក្រសួង​ហិរញ្ញវត្ថុ​កំពុង​បង្កើត​សេចក្តី​ព្រាង​ច្បាប់​ស្តី​ពី​ពន្ធ​អាករ​សម្រាប់​ភេសជ្ជៈ​ផ្អែម។

លោកស្រីអនុប្រធានបាននិយាយថា វាគួរតែមានការចាត់ថ្នាក់កម្រិតជាតិស្ករឱ្យបានច្បាស់លាស់ ដែលមានន័យថា ជាតិស្ករកាន់តែច្រើន តម្លៃពន្ធក៏កាន់តែខ្ពស់។ លោកស្រីបាន​ស្នើ​ថា ភេសជ្ជៈ​ដែល​មាន​កម្រិត​ជាតិ​ស្ករ​ក្រោម​កម្រិត​ជាក់លាក់មួយ នឹង​មិន​ចាំបាច់​ត្រូវ​យក​ពន្ធ​បន្ថែមនោះទេ។ ក្រសួង​ក៏បាននិយាយដែរថា នៅក្នុងប៉ុន្មានឆ្នាំចុងក្រោយនេះ ភេសជ្ជៈ​ផ្អែមមានការរីកលូតលាស់យ៉ាងខ្លាំង ហើយពួកគេរំពឹងថា ភេសជ្ជៈ​ទាំង​នេះ​នឹង​កើន​ឡើង​ពី ៣ ទៅ ៥% ​ក្នុង​រយៈ​ពេល ៥ ឆ្នាំ​ខាង​មុខ។

យោងតាមនិយមន័យរបស់អង្គការ​សុខភាព​ពិភពលោក ភេសជ្ជៈផ្អែមគឺជាភេសជ្ជៈដែលមានជាតិស្ករបន្ថែម ដូចជាទឹកសូដាផ្អែម ទឹកក្រូចដប និងភេសជ្ជៈប៉ូវកម្លាំង។ WHO ណែនាំឱ្យមានការដាក់ពន្ធលើភេសជ្ជៈផ្អែមលើសកម្រិតបែបនេះ គឺដើម្បីសុខភាព និងកាត់បន្ថយជំងឺធាត់ក្នុងចំណោមប្រជាជន។ យ៉ាងណាក៏ដោយ ក្រសួងសុខាភិបាលវៀតណាមនៅមិនទាន់វាយតម្លៃកម្រិតជាតិស្ករ ដែលនឹងត្រូវគិតពន្ធគយបន្ថែមនោះទេ។ ជាមួយគ្នានេះ ក្រុមហ៊ុនភេសជ្ជៈជាច្រើនក៏កំពុងស្នើសុំឱ្យពន្យារពេលការដាក់ពន្ធនេះ ដោយសារតែពួកគេទើបតែងើបពីជំងឺ COVID-19 ដែលបានប៉ះពាល់យ៉ាងខ្លាំង លើការផលិតក្នុងឆ្នាំកន្លងមក៕

អត្ថបទ៖ លីដា
ប្រភព៖ VNExpress

យោងតាមការចុះផ្សាយរបស់ The Thaiger បានឱ្យដឹងថា អ្នកប្រមូលទិញកាក់ និងក្រដាសប្រាក់ថៃមួយរូប បានប្រកាសរកទិញក្រដាសប្រាក់ ២០បាត ដ៏កម្រមួយ ហើយគាត់នឹងហ៊ានឱ្យថ្លៃរហូតដល់ទៅ ៣,០០០បាត នៅក្នុងមួយសន្លឹក។ ក្រដាសប្រាក់ ២០ បាតថ្មី ដែលបញ្ចេញឱ្យចរាចរកាលពីឆ្នាំមុន ត្រូវបានបោះពុម្ពដោយគ្មានបន្ទាត់បញ្ឈរនៅខាងឆ្វេង (ដូចក្នុងរូបខាងក្រោម) ហើយលោក Gig ដែលជាអ្នកប្រមូលទិញ នឹងផ្ដល់ជូនរហូតដល់ ៣,០០០បាត ទៅតាមស្ថានភាពក្រដាសនៅចាស់ ឬថ្មី។

លោក Gig បានប្រកាសរកក្រដាសប្រាក់ ២០បាត តាំងតែពីខែឧសភា ឆ្នាំមុន ដោយសារគាត់ដឹងថា ក្រដាសប្រាក់កម្រនេះនៅមានចរាចរ ហើយកាលពីខែមុន គាត់ក៏ធ្លាប់ប្រកាសឱ្យថ្លៃ ១,៥០០បាត ប៉ុន្តែពុំទាន់រកឃើញអ្នកលក់នោះទេ។ គាត់ក៏ហ៊ានឱ្យថ្លៃពី ៥០,០០០ ទៅ ១៥០,០០០បាត នៅក្នុងមួយដុំក្រដាសប្រាក់ដែលមាន ១០០សន្លឹកផងដែរ (លុយដែលបោះពុម្ភក្នុងបាច់តែមួយ)។

អត្ថបទ៖ លីដា
ប្រភព៖ The Thaiger

អាជ្ញាធរសុខាភិបាលបាននិយាយកាលពីថ្ងៃសុក្រនេះថា ចំនួនអ្នកស្លាប់ដោយសារអគ្គីភ័យដែលបានឆាបឆេះនៅឃ្លាំងស្តុកប្រេងឥណ្ឌូណេស៊ី គ្រប់គ្រងដោយក្រុមហ៊ុនថាមពលរដ្ឋ Pertamina កាលពីថ្ងៃទី០៣ ខែមីនា បានកើនឡើងដល់ ៣៣ នាក់ហើយ ខណៈជាង ១០ នាក់ទៀតស្ថិតក្នុងស្ថានភាពធ្ងន់ធ្ងរ។

ក្រុមមន្ត្រីកំពូលបានអំពាវនាវឱ្យមានសវនកម្មលើបរិក្ខារថាមពលរបស់ប្រទេសឥណ្ឌូណេស៊ី បន្ទាប់ពីភ្លើងបានឆាបឆេះតំបន់លំនៅដ្ឋានក្បែរនោះ ដោយបានឆេះផ្ទះ និងឆេះរថយន្ត នៅក្បែរដេប៉ូក្នុងរដ្ឋធានីហ្សាការតា។ អាជ្ញាធរបានប្រកាសថា មនុស្សចំនួន ១៨ នាក់បានស្លាប់ នៅថ្ងៃបន្ទាប់ពីការឆាបឆេះ៕

អត្ថបទ៖ លីដា
ប្រភព៖ CGTN