យ៉ាងហោចណាស់មានមនុស្សចំនួន ៤នាក់ បានស្លាប់ និងជាច្រើននាក់ផ្សេងទៀតបានរងរបួស បន្ទាប់ពីកន្លែងឈរមើលការបញ្ជល់គោមួយកន្លែង បានដួលរលំនៅកណ្តាលប្រទេសកូឡុំប៊ី នេះបើតាមការចុះផ្សាយរបស់សារព័ត៌មានBBC។ វីដេអូ​បង្ហោះលើអ៉ីនធឺណិត​ បានបង្ហាញ​ពី​កន្លែង​ឈរ​មើលកម្ពស់ ៣ជាន់ ​ដែល​ពោរពេញ​ទៅ​ដោយ​អ្នក​ទស្សនា បាន​ដួលរលំ​នៅ​កីឡដ្ឋានមួយ​ក្នុង​ក្រុង El Espinal។ វាគឺស្ថិតនៅក្នុងព្រឹត្តិការណ៍ប្រពៃណីមួយ មានឈ្មោះថា «corraleja» ហើយវាតែងតែត្រូវបានប្រារព្ធឡើង បើទោះបីប្រធានាធិបតីលោក Gustavo Petro បានជំរុញឱ្យមន្ត្រីក្នុងតំបន់ហាមឃាត់ព្រឹត្តិការណ៍ដែលនាំឱ្យមានហានិភ័យទាំងជីវិតមនុស្ស និងសត្វក៏ដោយ។

អភិបាលក្រុង Tolima លោក Jose Ricardo Orozco បាននិយាយថា អ្នកស្លាប់រួមមានស្ត្រី ២នាក់, បុរស ១នាក់ និងកុមារ ១នាក់ ហើយមនុស្សចំនួន ៣០នាក់ បានរងរបួសយ៉ាងធ្ងន់ធ្ងរ។ ជាមួយគ្នានេះដែរ ក៏មានគោ​មួយ​ក្បាល​​បាន​រត់​គេច​ចេញពី​កីឡដ្ឋាន ដែល​បង្ក​ការ​ភ័យ​ស្លន់ស្លោ​ក្នុង​ក្រុងបន្ថែមទៀត។ សារព័ត៌មាន El Tiempo រាយការណ៍ថា មន្ទីរពេទ្យ និងសេវារថយន្តសង្គ្រោះរបស់ទីក្រុង ពេលនេះមិនអាចទប់ទល់នឹងចំនួនអ្នករបួសបានទេ។ គួរឱ្យដឹងដែរថា ការបំពាន ឬធ្វើបាបសត្វ គឺជាឧក្រិដ្ឋកម្មនៅក្នុងប្រទេសកូឡុំប៊ី ប៉ុន្តែការបញ្ជល់គោ និងការជល់មាន់ត្រូវបានគេការពារ ដោយសារតែពួកវា គឺជាផ្នែកនៃវប្បធម៌របស់ប្រទេសនេះ៕

អត្ថបទ៖ លីដា
ប្រភព៖ BBC