រដ្ឋមន្ត្រីការបរទេសអាមេរិកលោក Antony Blinken គ្រោងនឹងជួបសមភាគីចិន ក្នុងអំឡុងពេលកិច្ចប្រជុំរដ្ឋមន្ត្រីការបរទេស G20 នៅកោះបាលីក្នុងសប្តាហ៍នេះ សម្រាប់ «ការជជែកដោយស្មោះត្រង់» ស្តីពីការឆ្លើយតបរបស់ទីក្រុងប៉េកាំង ចំពោះស្ថានការណ៍សង្គ្រាមនៅអ៊ុយក្រែន។ ឧបការីរដ្ឋមន្ត្រីការបរទេសទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក Dan Kritenbrink បាននិយាយតាមទូរស័ព្ទ​ជាមួយ​អ្នក​យក​ព័ត៌មាន​កាល​ពី​ថ្ងៃ​អង្គារថា អាទិភាពកំពូលសម្រាប់កិច្ចប្រជុំរវាងលោក Blinken និងរដ្ឋមន្ត្រីការបរទេសចិនលោក Wang Yi គឺដើម្បី «គូសបញ្ជាក់ការប្តេជ្ញាចិត្តរបស់យើង ចំពោះទំនាក់ទំនងការទូតដ៏ខ្លាំងក្លា និងការរក្សាបាននូវទំនាក់ទំនងបើកចំហរ ជាមួយសាធារណៈរដ្ឋប្រជាមានិតចិន»។

កាលពីសប្តាហ៍មុន ប្រទេសចិនជាលើកដំបូងត្រូវបានដាក់ចូលនៅក្នុង «គំនិតយុទ្ធសាស្ត្រ» របស់អង្គការណាតូ ដែលត្រូវបានអនុម័តនៅក្នុងកិច្ចប្រជុំកំពូលរបស់ប្លុក នៅទីក្រុងម៉ាឌ្រីត ប្រទេសអេស្ប៉ាញ។ ឯកសារនេះបង្ហាញពីបញ្ហាប្រឈមផ្នែកសន្តិសុខ ដែលសម្ព័ន្ធមិត្តយោធាដឹកនាំដោយសហរដ្ឋអាមេរិកកំពុងប្រឈម ខណៈដែលកំពុងគូសបញ្ជាក់អំពីសកម្មភាព មហិច្ឆតា និង «គោលនយោបាយបង្ខិតបង្ខំ» របស់ប្រទេសចិន ដែលបានប្រកួតប្រជែងនឹងគំនិត សន្តិសុខ និងតម្លៃរបស់សម្ព័ន្ធមិត្ត។

ការផ្លាស់ប្តូរនេះបានកើតឡើង បន្ទាប់ពីក្រុមសេដ្ឋកិច្ចប្រជាធិបតេយ្យសំខាន់ៗទាំង៧ (G7) មានភាពតឹងតែងពាក់ព័ន្ធនឹងប្រទេសចិន នៅក្នុងសេចក្តីថ្លែងការណ៍ផ្ទាល់របស់ពួកគេ ដែលបានចេញផ្សាយប៉ុន្មានថ្ងៃ បន្ទាប់ពីការចាប់ផ្តើមផែនការវិនិយោគហេដ្ឋារចនាសម្ព័ន្ធ ដើម្បីប្រឆាំងនឹងគំនិតផ្តួចផ្តើមខ្សែក្រវ៉ាត់និងផ្លូវរបស់ចិន៕

អត្ថបទ៖ លីដា
ប្រភព៖ CNN