សហរដ្ឋអាមេរិកអនុញ្ញាតឱសថការីនៅតាមឱសថស្ថានរដ្ឋ អាចចេញវេជ្ជបញ្ជាលើថ្នាំគ្រាប់ព្យាបាលជំងឺកូវីដ១៩ Paxlovid របស់ក្រុមហ៊ុន Pfizer

រដ្ឋបាលចំណីអាហារ និងឪសថអាមេរិក (FDA) នៅថ្ងៃពុធ ទី០៦ ខែកក្កដា បាននិយាយថា ខ្លួនបានអនុញ្ញាតឱសថការី ដែលមានអាជ្ញាប័ណ្ណពីរដ្ឋ អាចចេញវេជ្ជបញ្ជាលើថ្នាំគ្រាប់ Paxlovid របស់ក្រុមហ៊ុន Pfizer សម្រាប់ការព្យាបាលជំងឺ COVID-19  ដល់អ្នកជំងឺដែលអាចទទួលយកវាបាន ដើម្បីជួយកែលម្អលទ្ធភាពទទួលបានការព្យាបាល។ ថ្នាំនេះត្រូវបានគេបើកផ្លូវ និងអាចរកបានដោយឥតគិតថ្លៃនៅក្នុងសហរដ្ឋអាមេរិកចាប់តាំងពីខែធ្នូ ប៉ុន្តែមានត្រឹមតែជិត ៤ លានឈុត ប៉ុណ្ណោះ ដែលត្រូវបានរដ្ឋបញ្ជូនទៅឱ្យតាមឱសថស្ថាន។ ថ្នាំគ្រាប់នេះត្រូវបានអនុញ្ញាតដើម្បីព្យាបាលអ្នកឆ្លងថ្មី ឬអ្នកជំងឺដែលមានហានិភ័យឈឺធ្ងន់ធ្ងរ ខណៈសហរដ្ឋអាមេរិកក៏កំពុងមើលឃើញពីការកើនឡើងនៃករណីថ្មីៗផងដែរ។

លោកស្រី Patrizia Cavazzoni នាយកមជ្ឈមណ្ឌលវាយតម្លៃ និងស្រាវជ្រាវឱសថរបស់ FDA បាននិយាយនៅក្នុងសេចក្តីថ្លែងការណ៍មួយថា៖«ដោយសារ Paxlovid ត្រូវតែប្រើប្រាស់ក្នុងរយៈពេល ៥ថ្ងៃ បន្ទាប់ពីរោគសញ្ញាជំងឺចាប់ផ្តើម ការអនុញ្ញាតឱ្យឱសថការីដែលមានអាជ្ញាប័ណ្ណពីរដ្ឋ ចេញវេជ្ជបញ្ជាលើ Paxlovid វាអាចពង្រីកលទ្ធភាពទទួលបានការព្យាបាលទាន់ពេលវេលាសម្រាប់អ្នកជំងឺមួយចំនួន»។ ទីភ្នាក់ងារនេះបាននិយាយថា អ្នកជំងឺដែលបានធ្វើតេស្តវិជ្ជមានសម្រាប់ជំងឺ COVID-19 គួរតែនាំយកកំណត់ត្រាសុខភាពរបស់ពួកគេ ដើម្បីឱ្យឱសថការីពិនិត្យរកមើលបញ្ហាតម្រងនោម និងថ្លើមរបស់ពួកគេ។

ប្រធាន AMA លោក Jack Resneck បាននិយាយថា៖«ថ្នាំ Paxlovid មិនមែនសម្រាប់មនុស្សគ្រប់គ្នាទេ ហើយការចេញវេជ្ជបញ្ជា វាទាមទារចំណេះដឹងអំពីប្រវត្តិវេជ្ជសាស្ត្ររបស់អ្នកជំងឺ ក៏ដូចជាការត្រួតពិនិត្យគ្លីនិកសម្រាប់ផលប៉ះពាល់ និងការថែទាំតាមដាន ដើម្បីកំណត់ថាតើអ្នកជំងឺកំពុងប្រសើរឡើង ឬអត់»។ FDA បាននិយាយថា ឱសថការីគួរតែបញ្ជូនអ្នកជំងឺទៅអ្នកជំនាញថែទាំសុខភាពដែលមានអាជ្ញាប័ណ្ណ ដើម្បីចេញវេជ្ជបញ្ជាឱសថ ប្រសិនបើមិនមានព័ត៌មានគ្រប់គ្រាន់ ដើម្បីវាយតម្លៃមុខងារតម្រងនោម ឬថ្លើម ឬប្រសិនបើការកែប្រែគឺចាំបាច់ដោយសារតែប្រតិកម្មថ្នាំដែលអាចកើតមាន៕

អត្ថបទ៖ លីដា
ប្រភព៖ Channel News Asia