មន្ត្រីថៃកំពុងស្វែងរក​បុរស​ជនជាតិ​អឺរ៉ុប​ម្នាក់ ​ដែលមានទំនាក់ទំនងដោយផ្ទាល់ជាមួយ​អ្នក​ជំងឺ​អុតស្វា monkeypox ​​ទី​២ របស់​ប្រទេសថៃ​។ នាយកដ្ឋានវិទ្យាសាស្ត្រវេជ្ជសាស្ត្របាននិយាយកាលពីថ្ងៃព្រហស្បតិ៍ថា លទ្ធផលតេស្តបង្ហាញថា បុរសជនជាតិថៃអាយុ ៤៧ឆ្នាំម្នាក់ ដែលត្រូវបានបញ្ជូនទៅមន្ទីរពេទ្យ Vajira ក្នុងទីក្រុងបាងកកកាលពីសប្តាហ៍មុន បានវិជ្ជមានចំពោះជំងឺអុតស្វា ខណៈលោក Sopon Iamsirithaworn អគ្គនាយករងនៃនាយកដ្ឋានគ្រប់គ្រងជំងឺ បានបញ្ជាក់ថា អ្នកជំងឺអុតស្វាម្នាក់នោះ មានទំនាក់ទំនងរាងកាយជាមួយបុរសជនជាតិអឺរ៉ុបដែលគេកំពុងស្វែងរក។ អ្នកទាំង ២ ត្រូវបានគេដឹងថា បានស្គាល់គ្នាតាមរយៈបណ្ដាញសង្គម។

លោក​ Sopon Iamsirithaworn បាន​មាន​ប្រសាសន៍​ថា៖«យើង​មិន​ដឹង​ថា​ជន​បរទេស​នោះ​រស់​នៅ​ទី​ណា ឬ​ថា​គាត់​បាន​ចាក​ចេញ​ពី​ប្រទេស​នោះ​ទេ»។ យ៉ាងណា ក្រុមស៊ើបអង្កេតជំងឺរបស់ក្រសួងសុខាភិបាលសាធារណៈកំពុងព្យាយាមតាមដានបុរសនោះ។ លោកបាននិយាយថា ក្រុមស៊ើបអង្កេតជំងឺនឹងពិនិត្យមើលវីដេអូកាមេរ៉ា CCTV និងសហការជាមួយភ្នាក់ងារពាក់ព័ន្ធ ដូចជាប៉ូលីសទេសចរណ៍ និងស្ថានទូត ដើម្បីស្វែងរកបុរសជនជាតិអឺរ៉ុបនោះ។ លោក​បារម្ភ​ថា នេះ​អាច​ជា​ការ​ចាប់​ផ្តើម​នៃ​ការ​ផ្ទុះ​ជំងឺ​ស្វា​ក្នុង​ប្រទេស​ថៃ ដោយ​បន្ថែម​ថា ក្រុម​ស៊ើបអង្កេត​ជំងឺ​ក៏​នឹង​ស្វែងរក​មនុស្ស​ផ្សេង​ទៀត ​ដែល​បាន​ប៉ះ​ពាល់​អ្នក​ជំងឺ​ផង​ដែរ។ កាលពីព្រឹកថ្ងៃព្រហស្បតិ៍ អគ្គនាយកនាយកដ្ឋាន លោក Opas Karnkawinpong បាននិយាយថា ពួកគេកំពុងធ្វើតេស្ដលើមនុស្ស ១០នាក់ ដែលបានទាក់ទងជាមួយអ្នកជំងឺអុតស្វាទី២ ម្នាក់នេះ៕

អត្ថបទ៖ លីដា
ប្រភព៖ The Nation Thailand