យោងតាមក្រសួងសុខាភិបាលរបស់ប្រទេសប្រេស៊ីលបានបញ្ជាក់កាលពីថ្ងៃទី ២៩ ខែកក្កដាថា មានករណីស្លាប់ដំបូងរបស់ប្រទេសដែលបណ្តាលមកពីជំងឺអុតស្វា ហើយ​ជា​ការ​ស្លាប់​លើក​ដំបូង​នៅ​ក្រៅ​ទ្វីប​អាហ្វ្រិកផងដែរ។ រដ្ឋមន្ត្រីសុខាភិបាលប្រេស៊ីលលោក Daniel Pereira បាននិយាយថា ជនរងគ្រោះគឺជាបុរសអាយុ ៤១ ឆ្នាំរស់នៅក្នុងរដ្ឋ Minas Gerais ដែលមានភាពស៊ាំទាប និងមានជម្ងឺពីកំណើត ថែមទាំងមានជំងឺមហារីកកូនកណ្តុរ ដែលគាត់មានប្រវត្តិព្យាបាលដោយគីមី។ ចំណែកវេជ្ជបណ្ឌិតបាន​និយាយ​ថា មូលហេតុ​នៃ​ការ​ស្លាប់​គឺ​ដោយសារ​ការ​ឆ្លងមេរោគជំងឺអុតស្វាក្នុងឈាមដោយស្ថានភាព​ជំងឺ​ដែល​មាន​ពីមុន​បាន​ធ្វើ​ឲ្យ​រោគសញ្ញា​នៃ​ជំងឺ​អុតស្វា​កាន់តែ​ធ្ងន់ធ្ងរ ហើយ​ធ្វើអោយគាត់​បាន​ស្លាប់​បន្ទាប់​ពី​បាន​ចូល​ទៅ​បន្ទប់​សង្គ្រោះ​បន្ទាន់​នៃ​មន្ទីរពេទ្យ​ក្នុង​ទីក្រុង Belo Horizonte។

យ៉ាង​ណា​មិញ ប៉ុន្មាន​ម៉ោង​បន្ទាប់ពី​ប្រេស៊ីល​បាន​ប្រកាស​ថាមានករណីមានអ្នក​ស្លាប់​ដោយ​សារ​ជំងឺ​អុតស្វាដំបូង យោងតាម​ក្រសួង​សុខាភិបាល​អេ​ស្ប៉ា​ញ​ បានប្រកាសការ​ស្លាប់​ដំបូងដោយសារជម្ងឺអុតស្វា​ផង​ដែរ​ ដោយត្រូវ​បាន​គេ​ចាត់​ទុក​ថា​ជា​ទី​មួយ​របស់​អឺរ៉ុប។

គួរបញ្ជាក់អោយដឹងផងដែរថា៖ មកទល់ពេលនេះ ប្រទេសប្រេស៊ីលបានកត់ត្រាករណីជំងឺអុតស្វាចំនួន ១,០៦៦ ករណីនៅក្នុងរដ្ឋចំនួន ១៦ ដោយករណីភាគច្រើននៅរដ្ឋ Sao Paulo ។ ខណៈដែលមុននេះអង្គការ​សុខភាព​ពិភពលោក​ធ្លាប់​បាន​បញ្ជាក់​ពី​ការ​ស្លាប់​ចំនួន ​៥​នាក់​ដោយ​សារ​ជំងឺ​អុតស្វា ដែល​ករណីទាំងអស់​គឺនៅ​ទ្វីប​អាហ្វ្រិក។ ចំណែកអង្គការសុខភាពសាធារណៈ Pan American បាននិយាយថា ប្រេស៊ីល សហរដ្ឋអាមេរិក និងកាណាដា គឺជាប្រទេសចំនួនបីដែលមានការផ្ទុះឡើងនៃជំងឺអុតស្វាច្រើនជាងគេនៅអាមេរិករហូតមកដល់ពេលនេះ មានអ្នកឆ្លងជាង ៥,០០០ នាក់ហើយ៕

អត្ថបទ៖ Bee
ប្រភព៖ thairath