អ៊ុយក្រែនបានធ្វើការដឹកជញ្ជូនគ្រាប់ធញ្ញជាតិជាលើកដំបូងរបស់ខ្លួន ចាប់តាំងពីការឈ្លានពានរបស់រុស្ស៊ី ដែលជាជំហានដំបូងដ៏តូចមួយ ប៉ុន្តែឆ្ពោះទៅរកការដោះស្រាយបញ្ហាគ្រាប់ធញ្ញជាតិរាប់លានតោនរបស់ប្រទេសនេះ និងជំរុញការផ្គត់ផ្គង់ស្បៀងអាហារជាសកល។ ប្រទេសទួរគីដែលជាឈ្មួញកណ្តាលនៃកិច្ចព្រមព្រៀងរវាងអ៊ុយក្រែន-រុស្ស៊ី ដើម្បីចាប់ផ្តើមការនាំចេញគ្រាប់ធញ្ញជាតិឡើងវិញ បានឱ្យដឹងថា នាវា Razoni ដែលជាកប៉ាល់ដឹកទំនិញផ្ទុកពោត ២៦,០០០ តោន បានចាកចេញទៅកាន់ប្រទេសលីបង់ នៅព្រឹកថ្ងៃច័ន្ទនេះផ្ទាល់តែម្ដង។

គួរឱ្យដឹងដែរថា ប្រទេសអ៊ុយក្រែនគឺជាអ្នកផ្គត់ផ្គង់ស្រូវសាលី ពោត និងប្រេងបន្លែដ៏ធំបំផុតមួយ ហើយការបាត់បង់ការនាំចេញតាមរយៈកំពង់ផែសមុទ្រខ្មៅរបស់ខ្លួន បានធ្វើឱ្យរង្គោះរង្គើពាណិជ្ជកម្មស្បៀងអាហារពិភពលោក និងបង្កើនការគំរាមកំហែងនៃវិបត្តិស្បៀងអាហារពិភពលោក។ កប៉ាល់ជាច្រើនត្រូវបានជាប់គាំងនៅក្នុងកំពង់ផែ ដែលស្ថិតនៅតាមបណ្តោយសមុទ្រខ្មៅ ហើយត្រូវបានគេរំពឹងថា នឹងចាប់ផ្តើមចេញដំណើរបន្ដគ្នា ប្រសិនបើអ្វីៗដំណើរការល្អ។

ទោះជាយ៉ាងណាក៏ដោយ ម្ចាស់កប៉ាល់នឹងត្រូវធានាការធានារ៉ាប់រងសម្រាប់ទំនិញ និងកប៉ាល់របស់ពួកគេ ហើយត្រូវមាននាវិកគ្រប់គ្រាន់ដើម្បីបើកទូកផងដែរ។ រដ្ឋមន្ត្រីក្រសួងហេដ្ឋារចនាសម្ព័ន្ធអ៊ុយក្រែនលោក Oleksandr Kubrakov បាននិយាយនៅក្នុងហ្វេសប៊ុកមុននេះថា មាននាវាចំនួន ១៦ ផ្សេងទៀតនៅក្នុងតំបន់ Odesa ក៏កំពុងរង់ចាំវេនរបស់ពួកគេ ដើម្បីចាកចេញផងដែរ៕

អត្ថបទ៖ លីដា
ប្រភព៖ BBC