អ្នកកាសែតជប៉ុនដែលមីយ៉ាន់ម៉ាបានចាប់ខ្លួន ពេលនេះត្រូវផ្ទេរពីប៉ុស្តិ៍ប៉ូលីសទៅកាន់ពន្ធនាគារ
អន្តរជាតិ August 5, 2022 lyda

អ្នកកាសែតជប៉ុនលោក Kubota Toru ដែលត្រូវបានគេចាប់ខ្លួននៅក្នុងប្រទេសមីយ៉ាន់ម៉ា ពេលនេះ ត្រូវបានគេផ្ទេរពីប៉ុស្តិ៍ប៉ូលីសទៅកាន់ពន្ធនាគារក្នុងទីក្រុងយ៉ាំងហ្គោន ហើយលោកក៏ត្រូវបានគេរំពឹងថា នឹងត្រូវប្រឈមមុខនឹងតុលាការ សម្រាប់ការចោទប្រកាន់នានាលើរូបគាត់។ រំលឹកផងដែរថា លោក Kubota ត្រូវ​បាន​ចាប់​ខ្លួន​ដោយ​កង​កម្លាំង​សន្តិសុខ​មីយ៉ាន់ម៉ា ខណៈពេល​ដែលគាត់​កំពុងធ្វើ​ការ​តវ៉ា​ប្រឆាំង​នឹង​របប​យោធា ​ក្នុង​ទីក្រុងយ៉ាំងហ្គោន កាល​ពី​ថ្ងៃ​ទី៣០ ខែ​កក្កដា កន្លងទៅ។

លោក Kubota ប្រឈមមុខនឹងការចោទប្រកាន់ រួមមានការបំពានច្បាប់អន្តោប្រវេសន៍ ដោយអាជ្ញាធរ​បានអះអាង​ថា គាត់​បានចូល​ប្រទេស​មីយ៉ាន់ម៉ា ដោយ​មាន​ទិដ្ឋាការ​ទេសចរណ៍ ប៉ុន្តែបានមកថតសកម្មភាព​បាតុកម្មទៅវិញ។ ជម្រាបផងដែរថា កាលពីក្នុងខែមេសា ឆ្នាំ២០២១ កងកម្លាំងយ៉ាន់ម៉ាក៏បានឃាត់ខ្លួនអ្នកកាសែតជប៉ុនម្នាក់ផ្សេងទៀត ដែលមានឈ្មោះថា Kitazumi Yuki ដោយគាត់ត្រូវបានគេចោទ​ប្រកាន់​ថា ​​ផ្សព្វផ្សាយ​ព័ត៌មាន​មិន​ពិត។ គាត់ត្រូវបានដោះលែងវិញ ប្រហែល ១ខែ បន្ទាប់ពីរដ្ឋាភិបាលជប៉ុនទាមទារឱ្យដោះលែងគាត់៕

អត្ថបទ៖ លីដា
ប្រភព៖ NHK