យោងតាមការចុះផ្សាយរបស់សារព័ត៌មាន បាងកកប៉ុស្ដិ៍ បានឱ្យដឹងថា ប្រទេសថៃបានរកឃើញករណី​​​ទី​៤ នៃជំងឺអុត​ស្វានៅថ្ងៃ​សុក្រ​នេះ ចេញពីអ្នក​ជំងឺម្នាក់រស់នៅក្នុងទីក្រុងបាងកក ហើយអ្នកជំងឺម្នាក់នោះ បានទៅដើរលេងកន្លែងកម្សាន្ដជាច្រើន ជាមួយនឹងជនបរទេស បើទោះបីជារូបគេមានចេញរោគសញ្ញាជាបណ្ដើរៗក៏ដោយ។ លោក Opas Karnkawinpong អគ្គនាយកនៃនាយកដ្ឋានគ្រប់គ្រងជំងឺបាននិយាយថា ករណីថ្មីបំផុតមួយនេះ គឺស្ត្រីអាយុ ២២ឆ្នាំម្នាក់ ដែលតែងទៅដើរលេងនៅតំបន់ ដែលមានហានិភ័យនៃការចម្លងជំងឺអុតស្វា។

លោក​ថា ស្ត្រី​រូប​នោះ​មានចេញរោគសញ្ញា​គ្រុន​ក្តៅ​ នៅ​ថ្ងៃ​ទី​២៩ ខែ​កក្កដា ប៉ុន្តែ​នៅ​តែ​ទៅ​លេង​កន្លែង​កម្សាន្ត​ក្នុង​ទីក្រុង​បាងកក ជាមួយ​មិត្តភ័ក្តិ​ថៃ និង​បរទេសរបស់ខ្លួន។ លុះនៅថ្ងៃទី៣០ ខែកក្កដា គាត់បានចាប់ផ្តើមមានពងបែកនៅលើដៃ និងជើង មុនពេលវារាលដាលដល់សរីរាង្គផ្លូវភេទរបស់គាត់ និងផ្នែកផ្សេងៗនៃរាងកាយ។ កាល​ពី​ថ្ងៃ​ពុធ ស្ត្រី​រូប​នេះ​បាន​ទៅ​ព្យាបាល​នៅ​មន្ទីរពេទ្យ​ក្នុង​ខេត្ត Samut Prakan ហើយលទ្ធផល​នៃ​ការ​ធ្វើ​តេស្ត​មន្ទីរពិសោធន៍​កាលពី​ថ្ងៃ​ព្រហស្បតិ៍ ​ដែល​ធ្វើឡើង​ដោយ​នាយកដ្ឋាន​វិទ្យាសាស្ត្រ​វេជ្ជសាស្ត្រ និង​មហាវិទ្យាល័យ​វេជ្ជសាស្ត្រ​នៃ​សាកលវិទ្យាល័យ Chulalongkorn បាន​បង្ហាញ​ថា​ គាត់បាន​ឆ្លង​ជំងឺ​អុត​ស្វា​៕

អត្ថបទ៖ លីដា
ប្រភព៖ បាងកកប៉ុស្ដិ៍