អន្តរជាតិ

ក្រុមហ៊ុនអាកាសចរណ៍ជាច្រើនបានលុបចោលជើងហោះហើរ និងបានប្តូរផ្លូវអាកាសឆ្លងកាត់ដែនអាកាសចិន ខណៈពេលដែលមានការសមយុទ្ធយោធា

BY
Bee
August 6, 2022

នេះបើយោងតាមសារព័ត៌មាន Al Jazeera ចេញផ្សាយនៅថ្ងៃទី៥ ខែសីហា ឆ្នាំ២០២២ ក្រុមហ៊ុនអាកាសចរណ៍ធំៗជាច្រើន រួមមាន Korean Air, Asiana និង Singapore Airlines បានលុបចោលជើងហោះហើរជាច្រើន ក៏ដូចជាបានផ្លាស់ប្តូរផ្លូវហោះហើរ ដើម្បី​បញ្ចៀស​ដែនអាកាស​ខាងលើ​តំបន់​ដែល​យោធា​ចិន​កំពុង​អនុវត្ត​ទៅ​៦​ចំណុច​ជុំវិញ​កោះ​តៃវ៉ាន់​ ឆ្លើយតបនឹងករណីលោកស្រី Nancy Pelosi ប្រធានសភាតំណាងរាស្រ្តអាមេរិកបាន​ធ្វើ​ដំណើរ​ទៅ​កោះ​តៃវ៉ាន់​នៅ​ថ្ងៃ​ទី ២ ខែ​សីហា បើ​ទោះ​ជា​រដ្ឋាភិបាល​ចិន​បាន​ប្រឆាំង​យ៉ាង​ខ្លាំង​ក៏​ដោយ ហើយនេះក៏បានចង្អុលបង្ហាញថា ជាការបំពានយ៉ាងធ្ងន់ធ្ងរលើគោលការណ៍របស់ចិន។

សារព័ត៌មាន Al Jazeera ក៏បានបន្តរាយការណ៍ថា «ក្រុមហ៊ុនអាកាសចរណ៍ Korean Air នៅក្នុងប្រទេសកូរ៉េខាងត្បូងបានលុបចោលជើងហោះហើរទាំងអស់ទៅកាន់កោះតៃវ៉ាន់នៅថ្ងៃសុក្រទី 5 ខែសីហា និងថ្ងៃសៅរ៍ទី 6 ខែសីហា ខណៈដែលក្រុមហ៊ុន Asiana Airlines ដែលជាគូប្រជែងនៅកូរ៉េខាងត្បូង ក៏បានផ្លាស់ប្តូរផ្លូវទៅតៃវ៉ាន់ដែរ ប៉ុន្តែក្រុមហ៊ុនអាកាសចរណ៍ Korean Air ក៏បានកំណត់ការហោះហើរឡើងវិញនៅថ្ងៃអាទិត្យរបស់ខ្លួនទៅកាន់ទីក្រុងតៃប៉ិក្នុងរយៈពេលមួយម៉ោង បន្ទាប់​ពី​ក្រុមហ៊ុន Asiana Airlines បាន​ប្រកាស​ពន្យារ​ពេល​បី​ម៉ោង​នៃ​ការ​ហោះ​ហើរ​កាល​ពី​ថ្ងៃ​ព្រហស្បតិ៍។ ចំណែកខាងក្រុមហ៊ុនអាកាសចរណ៍ Singapore airlines និងក្រុមហ៊ុនអាកាសចរណ៍ Scoot បានលុបចោលជើងហោះហើរទាំងអស់ រវាងសិង្ហបុរី និងតៃប៉ិ នៅថ្ងៃសុក្រ ទី៥ ខែសីហា ហើយនឹងតាមដានស្ថានការណ៍បន្តទៀត។

ខណៈពេលដែលក្រុមហ៊ុនអាកាសចរណ៍ ANA និង Japan Airlines នៅប្រទេសជប៉ុនបន្តដំណើរការជើងហោះហើរតាមកាលវិភាគ ប៉ុន្តែបានប្តូរជើងហោះហើរទៅកាន់ទីក្រុងតៃប៉ិ ហុងកុង និងអាស៊ីអាគ្នេយ៍ ដើម្បីបញ្ចៀសដែនអាកាស ដែលចិនកំពុងធ្វើសមយុទ្ធយោធា។

គួរបញ្ជាក់អោយដឹងផងដែរថា៖ កងទ័ពចិនកំពុងធ្វើសមយុទ្ធបាញ់គ្រាប់ពិតដ៏ធំបំផុតមិនធ្លាប់មាននៅច្រកសមុទ្រតៃវ៉ាន់ ដែលបានចាប់ផ្តើមពីថ្ងៃទី ៤ ខែសីហា រហូតដល់ថ្ងៃអាទិត្យ ទី ៧ ខែសីហា ដោយមានការបាញ់កាំជ្រួចទាំងពីរ បញ្ជូនយន្តហោះចម្បាំង និងនាវាចម្បាំង ទៅ​កាន់​តំបន់​ដែល​មាន​សមយុទ្ធ​ចំនួន​៦​ជុំវិញ​កោះ​តៃវ៉ាន់៕


អត្ថបទ៖ Bee
ប្រភព៖ aljazeera

Share This Post:

អន្តរជាតិ

ភ្លៀងធ្លាក់ខ្លាំងនៅជប៉ុន បានធ្វើឱ្យមនុស្សម្នាក់បាត់បង់ជីវិត ២នាក់បាត់ខ្លួន និងជាច្រើននាក់រងរបួស

BY
Lyda
June 3, 2023

ភ្លៀងធ្លាក់ខ្លាំងពាសពេញផ្នែកខ្លះនៃប្រទេសជប៉ុន បានសម្លាប់មនុស្សម្នាក់ និងធ្វើឱ្យមនុស្ស ២ នាក់បាត់ខ្លួន និងរាប់សិបនាក់ទៀតរងរបួស នេះបើតាមអាជ្ញាធរបានឱ្យដឹងនៅថ្ងៃសៅរ៍ ទី០៣ ខែមិថុនា ឆ្នាំ២០២៣។ គ្រោះជន់លិចត្រូវបានបង្កឡើងដោយចំហាយនៃព្យុះទីហ្វុង Mawar ដែលឥឡូវនេះបានចុះថយទៅជាព្យុះត្រូពិច។ ក្រុមអ្នកជួយសង្គ្រោះនៅតំបន់ Toyohashi ភាគកណ្តាលនៃខេត្ត Aichi ដែលជាកន្លែងមានការជូនដំណឹងអំពីការជម្លៀសកម្រិតខ្ពស់បំផុតរបស់ប្រទេស បានរាយការណ៍កាលពីថ្ងៃសុក្រថា៖«រកឃើញបុរសម្នាក់អាយុប្រហែល ៦០ឆ្នាំ នៅក្នុងឡានដែលលិចទឹក ប៉ុន្តែក្រោយមកគាត់ត្រូវបានគេបញ្ជាក់ថា បានស្លាប់»។

នៅភាគខាងលិច Wakayama ជាកន្លែងដែលទន្លេជាច្រើនបានបាក់ច្រាំងទន្លេ ក្រុមមន្ត្រីបានប្រាប់ AFP ថា ពួកគេបានបន្តការស្វែងរកបុរសម្នាក់ និងស្ត្រីម្នាក់ដែលបាត់ខ្លួននៅក្នុងតំបន់នោះ។ ទីភ្នាក់ងារគ្រប់គ្រងគ្រោះអគ្គីភ័យ និងគ្រោះមហន្តរាយបាននិយាយថា មនុស្សសរុបចំនួន ៦ នាក់បានរងរបួសធ្ងន់ និង ២៤ នាក់បានរងរបួសស្រាល គិតត្រឹមព្រឹកថ្ងៃសៅរ៍នេះ។ នៅភាគកណ្តាល និងភាគខាងលិចប្រទេសជប៉ុន បទបញ្ជាជម្លៀសជាច្រើន ដែលមិនមែនជាការបង្ខិតបង្ខំ និងសូម្បីតែនៅកម្រិតខ្ពស់បំផុត ត្រូវបានបន្ធូបន្ថយនៅថ្ងៃសៅរ៍ ខណៈដែលភ្លៀងបានធូរស្រាល។ ប៉ុន្តែ​ការ​ព្រមាន​ថ្មី​ត្រូវ​បាន​ចេញ​នៅ​តំបន់​ជិត​ទីក្រុង​តូក្យូ​នៅ​ព្រឹក​ព្រលឹម ​អំពី​ហានិភ័យ​ទឹកជំនន់៕

អត្ថបទ៖ លីដា
ប្រភព៖ Channel News Asia

Share This Post:

អន្តរជាតិ

ថៃទទួលជោគជ័យក្នុងការប្រើប្រាស់ Drone ដឹកជញ្ជូនថ្នាំពេទ្យឆ្លងកាត់សមុទ្រដែលមានចម្ងាយ ១២គីឡូម៉ែត្រ

BY
Pheakdey
June 3, 2023

ថៃ៖ អាជ្ញាធរសុខាភិបាលថៃបានប្រកាសពីជោគជ័យថ្មីមួយក្នុងការប្រើប្រាស់បច្ចេកវិទ្យាទំនើបជំនួសឲ្យកម្លាំងមនុស្សនៅក្នុងកិច្ចការដឹកជញ្ជូនថ្នាំពេទ្យ ពោលគឺការប្រើប្រាស់យន្តហោះគ្មានមនុស្សបើកសម្រាប់ដឹកជញ្ជូនថ្នាំពេទ្យឆ្លងកាត់សមុទ្រ។​ បើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅព្រឹកថ្ងៃសៅរ៍ ទី៣ ខែមិថុនានេះបានបញ្ជាក់ថា មន្ទីរពេទ្យដែលជាកន្លែងទទួលយកថ្នាំពេទ្យតាមរយៈយន្តហោះគ្មានមនុស្សបើកនោះគឺមន្ទីរពេទ្យស្ថិតនៅលើកោះ Puyu ខេត្ត Satun ភាគខាងត្បូងប្រទេសថៃ។

ប្រភពខាងលើបានបន្តថា ចម្ងាយផ្លូវគិតចេញពីកន្លែងដែលគេបង្ហោះយន្តហោះគ្មានមនុស្សបើកទៅដល់មន្ទីរពេទ្យគឺមានប្រវែង ១២គីឡូម៉ែត្រ។ បើតាមលោកវេជ្ជបណ្ឌិត Nutthapong Wongwiwat ដែលជាអគ្គនាយករងនៃនាយកដ្ឋានសេវាវេជ្ជសាស្រ្តថៃបានបញ្ជាក់ថា យន្តហោះគ្មានមនុស្សបើកដែលអាជ្ញាធរថៃបានប្រើប្រាស់នោះគឺជាយន្តហោះគ្មានមនុស្សបើកប្រភេទ Swoop Kookaburra Mark 3 អភិវឌ្ឍដោយក្រុមហ៊ុនបច្ចេកវិទ្យា Skyports Swoop Aero ខណៈយន្តហោះគ្មានមនុស្សបើកប្រភេទនេះមានសមត្ថភាពអាចធ្វើដំណើរបានក្នុងរយៈចម្ងាយរហូតដល់ ១៧គីឡូម៉ែត្រ អាចផ្ទុកទំនិញបានចំនួន ៣គីឡូក្រាម អាចហោះហើរក្នុងល្បឿនរហូតដល់ ៦៨គីឡូម៉ែត្រក្នុងមួយម៉ោង និងអាចធ្វើដំណើរក្រោមដំណក់ទឹកភ្លៀងដែលធ្លាក់ក្នុងកម្រិតក្រោម ១០មីលីម៉ែត្រក្នុងម៉ោងបានទៀតផង៕

 អត្ថបទ៖ ភក្តី

ប្រភព៖ បាងកកប៉ុស្តិ៍

Share This Post:

អន្តរជាតិ

រលកកម្តៅបង្កឲ្យមានភ្លើងឆេះព្រៃយ៉ាងខ្លាំងនៅកាណាដា និងបង្ខំឲ្យពលរដ្ឋ ៣ម៉ឺននាក់ត្រូវជម្លៀសខ្លួនជាបន្ទាន់

BY
Pheakdey
June 3, 2023

កាណាដា៖ បញ្ហាភ្លើងឆេះព្រៃបានបន្តរាតត្បាតយ៉ាងខ្លាំងនៅតាមបណ្តាខេត្តមួយចំនួនស្ថិតនៅក្នុងតំបន់ភាគខាងកើតនៃប្រទេសកាណាដា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅរសៀលថ្ងៃសៅរ៍ ទី៣ ខែមិថុនានេះ។ បើតាមអាជ្ញាធរកាណាដាបានបញ្ជាក់ថា បញ្ហាខាងលើនេះបានកើតឡើងក្រោយ ពេលដែលសីតុណ្ហភាពបានកើនឡើងយ៉ាងខ្ពស់ក្នុងរយៈពេលប៉ុន្មានថ្ងៃចុងក្រោយនេះ ពោលវាគឺជាបញ្ហាធម្មជាតិដែលបានកើតឡើងដោយខ្លួនឯង។

ប្រភពខាងលើបានបន្តថា នៅក្នុងចំណោមខេត្តដែលកំពុងរងនូវការគំរាមគំហែងដោយបញ្ហាភ្លើងឆេះព្រៃនោះ គឺខេត្ត Québec បានរងនូវផលប៉ះពាល់ខ្លាំងជាងគេ ដោយគិតត្រឹមពេលនេះឥទ្ធិពលនៃបញ្ហាភ្លើងឆេះព្រៃបានបង្ខំឲ្យពលរដ្ឋនៅក្នុងខេត្តមួយនេះជាង ១០,០០០នាក់ត្រូវបង្ខំចិត្តធ្វើការជម្លៀសខ្លួនចេញពីផ្ទះសម្បែងរបស់ពួកគេជាបន្ទាន់ ដើម្បីទៅរកកន្លែងមានសុវត្ថិភាពស្នាក់នៅជាបណ្តោះអាសន្នសិន។ យ៉ាងណាក្តី បើគិតពីចំនួនពលរដ្ឋកាណាដាសរុបដែលបានបង្ខំចិត្តធ្វើការជម្លៀសដោយសារបញ្ហាភ្លើងឆេះព្រៃគឺគិតត្រឹមពេលនេះមានពលរដ្ឋប្រមាណជា ៣០,០០០នាក់ឯណោះ៕

អត្ថបទ៖ ភក្តី

ប្រភព៖ The Strait Time

Share This Post:

SPONSOR

អត្តបទទាក់ទង