ក្រុមហ៊ុនអាកាសចរណ៍ជាច្រើនបានលុបចោលជើងហោះហើរ និងបានប្តូរផ្លូវអាកាសឆ្លងកាត់ដែនអាកាសចិន ខណៈពេលដែលមានការសមយុទ្ធយោធា
អន្តរជាតិ August 6, 2022 Bee Food

នេះបើយោងតាមសារព័ត៌មាន Al Jazeera ចេញផ្សាយនៅថ្ងៃទី៥ ខែសីហា ឆ្នាំ២០២២ ក្រុមហ៊ុនអាកាសចរណ៍ធំៗជាច្រើន រួមមាន Korean Air, Asiana និង Singapore Airlines បានលុបចោលជើងហោះហើរជាច្រើន ក៏ដូចជាបានផ្លាស់ប្តូរផ្លូវហោះហើរ ដើម្បី​បញ្ចៀស​ដែនអាកាស​ខាងលើ​តំបន់​ដែល​យោធា​ចិន​កំពុង​អនុវត្ត​ទៅ​៦​ចំណុច​ជុំវិញ​កោះ​តៃវ៉ាន់​ ឆ្លើយតបនឹងករណីលោកស្រី Nancy Pelosi ប្រធានសភាតំណាងរាស្រ្តអាមេរិកបាន​ធ្វើ​ដំណើរ​ទៅ​កោះ​តៃវ៉ាន់​នៅ​ថ្ងៃ​ទី ២ ខែ​សីហា បើ​ទោះ​ជា​រដ្ឋាភិបាល​ចិន​បាន​ប្រឆាំង​យ៉ាង​ខ្លាំង​ក៏​ដោយ ហើយនេះក៏បានចង្អុលបង្ហាញថា ជាការបំពានយ៉ាងធ្ងន់ធ្ងរលើគោលការណ៍របស់ចិន។

សារព័ត៌មាន Al Jazeera ក៏បានបន្តរាយការណ៍ថា «ក្រុមហ៊ុនអាកាសចរណ៍ Korean Air នៅក្នុងប្រទេសកូរ៉េខាងត្បូងបានលុបចោលជើងហោះហើរទាំងអស់ទៅកាន់កោះតៃវ៉ាន់នៅថ្ងៃសុក្រទី 5 ខែសីហា និងថ្ងៃសៅរ៍ទី 6 ខែសីហា ខណៈដែលក្រុមហ៊ុន Asiana Airlines ដែលជាគូប្រជែងនៅកូរ៉េខាងត្បូង ក៏បានផ្លាស់ប្តូរផ្លូវទៅតៃវ៉ាន់ដែរ ប៉ុន្តែក្រុមហ៊ុនអាកាសចរណ៍ Korean Air ក៏បានកំណត់ការហោះហើរឡើងវិញនៅថ្ងៃអាទិត្យរបស់ខ្លួនទៅកាន់ទីក្រុងតៃប៉ិក្នុងរយៈពេលមួយម៉ោង បន្ទាប់​ពី​ក្រុមហ៊ុន Asiana Airlines បាន​ប្រកាស​ពន្យារ​ពេល​បី​ម៉ោង​នៃ​ការ​ហោះ​ហើរ​កាល​ពី​ថ្ងៃ​ព្រហស្បតិ៍។ ចំណែកខាងក្រុមហ៊ុនអាកាសចរណ៍ Singapore airlines និងក្រុមហ៊ុនអាកាសចរណ៍ Scoot បានលុបចោលជើងហោះហើរទាំងអស់ រវាងសិង្ហបុរី និងតៃប៉ិ នៅថ្ងៃសុក្រ ទី៥ ខែសីហា ហើយនឹងតាមដានស្ថានការណ៍បន្តទៀត។

ខណៈពេលដែលក្រុមហ៊ុនអាកាសចរណ៍ ANA និង Japan Airlines នៅប្រទេសជប៉ុនបន្តដំណើរការជើងហោះហើរតាមកាលវិភាគ ប៉ុន្តែបានប្តូរជើងហោះហើរទៅកាន់ទីក្រុងតៃប៉ិ ហុងកុង និងអាស៊ីអាគ្នេយ៍ ដើម្បីបញ្ចៀសដែនអាកាស ដែលចិនកំពុងធ្វើសមយុទ្ធយោធា។

គួរបញ្ជាក់អោយដឹងផងដែរថា៖ កងទ័ពចិនកំពុងធ្វើសមយុទ្ធបាញ់គ្រាប់ពិតដ៏ធំបំផុតមិនធ្លាប់មាននៅច្រកសមុទ្រតៃវ៉ាន់ ដែលបានចាប់ផ្តើមពីថ្ងៃទី ៤ ខែសីហា រហូតដល់ថ្ងៃអាទិត្យ ទី ៧ ខែសីហា ដោយមានការបាញ់កាំជ្រួចទាំងពីរ បញ្ជូនយន្តហោះចម្បាំង និងនាវាចម្បាំង ទៅ​កាន់​តំបន់​ដែល​មាន​សមយុទ្ធ​ចំនួន​៦​ជុំវិញ​កោះ​តៃវ៉ាន់៕


អត្ថបទ៖ Bee
ប្រភព៖ aljazeera