កងទ័ពរបស់កោះតៃវ៉ាន់ នៅថ្ងៃព្រហស្បតិ៍ ទី១១ ខែសីហា ឆ្នាំ២០២២ បានធ្វើសមយុទ្ធបាញ់គ្រាប់ពិតមួយផ្សេងទៀត បន្ទាប់ពីទីក្រុងប៉េកាំងបានបញ្ចប់សមយុទ្ធយោធាដ៏ធំបំផុតមិនធ្លាប់មានរបស់ខ្លួន នៅជុំវិញកោះនេះ ខណៈដែលខ្លួនបានគំរាមកំហែងម្តងហើយម្តងទៀត ក្នុងការនាំយកកោះតៃវ៉ាន់មកក្រោមការគ្រប់គ្រងរបស់ខ្លួនវិញ។ រំលឹកផងដែរថា ទីក្រុងប៉េកាំងបានខឹងសម្បារយ៉ាងខ្លាំង ជាមួយនឹងដំណើរទៅកាន់កោះតៃវ៉ាន់ដោយប្រធានសភាអាមេរិកលោកស្រី Nancy Pelosi កាលពីសប្តាហ៍មុន ដែលវាគឺជាការបំពេញទស្សនកិច្ចកម្រិតខ្ពស់បំផុតមួយក្នុងរយៈពេលជាច្រើនទសវត្សរ៍កន្លងមក។ យ៉ាងណា តៃវ៉ាន់បានចោទប្រកាន់ចិនថា បានប្រើប្រាស់ដំណើរទស្សនកិច្ចរបស់លោកស្រី Pelosi ជាលេស ដើម្បីអនុញ្ញាតឱ្យវាធ្វើការហាត់សម សម្រាប់ការឈ្លានពានកោះតៃវ៉ាន់។

លោក Lou Woei-jye អ្នក​នាំ​ពាក្យ​កង​ទ័ព​ទី៨ របស់កោះ​តៃវ៉ាន់ ​បាន​ប្រាប់សារព៧ត៌មាន AFP ថា កង​កម្លាំង​របស់​ខ្លួន​បាន​បាញ់​គ្រាប់ចេញពីប្រព័ន្ធកាំភ្លើងធំ howitzer និង​គ្រាប់ផ្ទុះផ្សេងទៀត​ ដែលជា​ផ្នែក​មួយ​នៃ​សមយុទ្ធ​ការពារ​រយៈពេល ១ម៉ោង កាលពី​ព្រឹក​ថ្ងៃ​ព្រហស្បតិ៍នេះ នៅស្រុក Pingtung ភាគខាងត្បូងតៃវ៉ាន់។ ក្រសួងការបរទេសរបស់តៃវ៉ាន់បាននិយាយថា ខ្លួនបានច្រានចោលគំរូ «ប្រទេសមួយ ប្រព័ន្ធពីរ» ដែលស្នើឡើងដោយទីក្រុងប៉េកាំង នៅក្នុងសៀវភៅសដែលបានបោះពុម្ពផ្សាយក្នុងសប្តាហ៍នេះ។ ជាក់ស្ដែងលោកស្រី Joanne Ou បានប្រាប់សន្និសីទសារព័ត៌មាននៅទីក្រុងតៃប៉ិថា មានតែប្រជាជនតៃវ៉ាន់ទេ ដែលអាចសម្រេចចិត្តអនាគតរបស់ខ្លួន ដោយបន្ថែមថា ប្រទេសចិនកំពុងប្រើប្រាស់ដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi ធ្វើជាលេស ដើម្បីបំភិតបំភ័យប្រជាជនតៃវ៉ាន់៕

អត្ថបទ៖ លីដា
ប្រភព៖ Channel News Asia