អន្តរជាតិ

ប្រទេសចិនកំពុងប្រយុទ្ធនឹងភ្លើងឆេះព្រៃ ហើយរំពឹងថានឹងមានភ្លៀងធ្លាក់នៅចុងខែនេះ

BY: autoadmin

: August 24, 2022

នេះបើតាមការចុះផ្សាយរបស់សារព័ត៌មាន Reuters កាលថ្ងៃទី២៣ ខែសីហា អាជ្ញាធរចិនកំពុងចល័តអ្នកពន្លត់អគ្គីភ័យ ដើម្បីទប់ស្កាត់ភ្លើងឆេះព្រៃនៅជិតទីក្រុង Chongqing និងតំបន់នានាក្នុងខេត្ត Sichuan ភាគនិរតីរបស់ប្រទេស ចំពេលដែលសីតុណ្ហភាពក្តៅខ្លាំងខុសពីធម្មតា និងការរំពឹងទុកថានឹងមានភ្លៀងធ្លាក់នៅចុងខែ។

ចំណែកទីស្នាក់ការព្យាករណ៍អាកាសធាតុរបស់ប្រទេសចិនបាននិយាយថា៖ រលកកំដៅបានមកដល់រយៈពេល ១២ថ្ងៃហើយ ហើយកម្រិតប្រកាសអាសន្នពណ៌ក្រហមត្រូវបានរក្សា ប៉ុន្តែសីតុណ្ហភាពត្រូវបានគេរំពឹងថា នឹងចាប់ផ្តើមធ្លាក់ចុះពីភ្លៀងនៅថ្ងៃទី ២៩ ខែសីហា ជាពិសេសនៅខេត្ត Sichuan និង Chongqing។

យោងតាមក្រសួងគ្រប់គ្រងគ្រាអាសន្នបានឱ្យដឹងថា មន្ត្រីកណ្តាលជាង ២,៨០០ នាក់ត្រូវបានបញ្ជូនជាមួយមន្ត្រីក្នុងតំបន់នៅក្នុងខេត្ត Chongqing និង Sichuan ដើម្បីជួយទប់ស្កាត់ភ្លើងឆេះព្រៃ។ ចំណែករលកកំដៅក៏បានប៉ះពាល់ដល់ដំណាំផងដែរ ដោយជំរុញឱ្យកសិករចិនដំឡើងប្រព័ន្ធស្រោចទឹកដោយស្វ័យប្រវត្តិ ហើយប្តូរទៅធ្វើការនៅពេលយប់ ដើម្បីជៀសវាងកំដៅខ្លាំង។ ដោយមានការរំពឹងទុកថារដូវប្រមូលផលខាងមុខទំនងជានឹងរងការខូចខាតច្រើនពីគ្រោះរាំងស្ងួតខាងលើ។

គួរបញ្ជាក់អោយដឹងផងដែរថា៖ ស្ថានភាពភ្លើងឆេះព្រៃបានជំរុញឱ្យអាជ្ញាធរចិនបង្កើនការប្រកាសអាសន្នដល់កម្រិតខ្ពស់បំផុត ខណៈដែលភ្លើងឆេះគឺមានគ្រោះថ្នាក់ខ្លាំង ជាពិសេសតំបន់កណ្តាល និងភាគខាងត្បូងនៃខេត្ត Chongqing និងភាគខាងកើតនៃខេត្ត Sichuan ជាដើម៕