តាមការប៉ាន់ស្មានមួយបានឱ្យដឹងថា អស់​រយៈ​ពេល​ ៦ខែ​ នៃការឈ្លានពានរបស់រុស្ស៊ីនៅ​ក្នុង​ប្រទេស​អ៊ុយក្រែន កងកម្លាំងរុស្ស៊ីប្រមាណជា ៨០,០០០ នាក់ បានស្លាប់ និងរងរបួស ដែលការបាត់បង់ទាំងនេះបានបង្ហាញថា កម្លាំងរបស់រុស្ស៊ីកំពុងមានការចុះខ្សោយជាងមុន។ ឥឡូវនេះប្រធានាធិបតីរុស្ស៊ី លោក វ្ល៉ាឌីមៀ ពូទីន បានសម្រេចចិត្តថា លោកនឹងបង្កើនចំនួនសមាជិកសេវាកម្មច្រើនជាង ១៣០,០០០ នាក់បន្ថែមទៀត ដែលនាំឱ្យ​ចំនួន​បុគ្គលិក​យោធា​រុស្ស៊ី​មានសរុប​ដល់ ២,០៣៩,៧៥៨ នាក់ ហើយក្នុងនោះ​មាន​ ១,១៥០,៦២៨ នាក់ គឺជាកងកម្លាំងប្រដាប់អាវុធ។

ច្បាប់ពីមុន ដែលបានដាក់ចេញតាំងពីដើមឆ្នាំ២០១៨ បានកំណត់ថា ចំនួនបុគ្គលិកយោធារុស្ស៊ីគឺមានសរុបចំនួន ១,៩០២,៧៥៨ នាក់ ដោយក្នុងនោះមានកងកម្លាំងប្រដាប់អាវុធចំនួន ១,០១៣,៦២៨ នាក់។ នេះមានន័យថា រុស្ស៊ីកំពុងបង្កើនកងកម្លាំងប្រដាប់អាវុធថ្មីៗបន្ថែមទៀត មិនមែនគ្រាន់តែបង្កើនចំនួនបុគ្គលិកយោធាទូទៅនោះទេ។ កន្លងមកពួកគេក៏បាននិយាយដែរថា កងកម្លាំងនៅក្នុងប្រតិបត្តិការពិសេសរបស់ខ្លួននៅអ៊ុយក្រែន គឺសុទ្ធតែជាកងកម្លាំងដែលចូលរួមដោយស្ម័គ្រចិត្តទាំងអស់។

មន្ត្រីការពារជាតិរុស្ស៊ីបាននិយាយថា ពួកគេកំពុងបន្ថយល្បឿននៃប្រតិបត្តិការពិសេសរបស់ពួកគេ ប៉ុន្តែកាលពីថ្ងៃពុធ ដែលជាថ្ងៃឯករាជ្យរបស់អ៊ុយក្រែន ពួកគេបានបាញ់មីស៊ីល ១គ្រាប់ នៅស្ថានីយ៍រថភ្លើងមួយនៅភាគខាងកើត។ ពួកគេនិយាយថា ពួកគេបានបំផ្លាញអាវុធ និងសម្លាប់ទាហានជាង ២០០នាក់។ មេដឹកនាំអ៊ុយក្រែនក៏បាននិយាយដែរថា មានមនុស្ស ២៥នាក់ ត្រូវបានសម្លាប់ រួមទាំងកុមារផងដែរ។ អាជ្ញាធរក្នុងទីក្រុងគៀវ កាន់តែមានការព្រួយបារម្ភកាន់តែខ្លាំងឡើងៗ ដោយការប្រយុទ្ធគ្នាជុំវិញរោងចក្រនុយក្លេអ៊ែរ Zaporizhzhia រួមទាំងភ្លើងឆេះនៅក្បែរអគារផងដែរ៕

អត្ថបទ៖ លីដា
ប្រភព៖ NHK