ថៃ៖ កាលពីថ្ងៃទី ២៦ ខែសីហា ឆ្នាំ២០២២កន្លងទៅ មានករណីមួយត្រូវបានារាយការណ៍ទៅកាន់មន្ត្រីនគរបាលប៉ុស្តិ៍ Phra Khanong រួមនឹងសាច់ញាតិបានចុះមកជួយ អ្នកស្រី ប៊ី (ជានាម ប្រឌិត) ដែលជាប់ក្នុងបន្ទប់ទឹកជាន់ទី៣ នៅក្នុងផ្ទះរយៈពេល៣ថ្ងៃ ដោយសារកូនសោទ្វារខូច ដោយគាត់បានផឹកទឹកពីម៉ាស៊ីនដើម្បីរស់ ហើយគាត់បានប្រើក្រែមនៅក្នុងបន្ទប់ទឹក ដើម្បីសរសេររៀបរាប់មូលហេតុនៅលើជញ្ជាំងប្រសិនបើនាងផុតដង្ហើមទៅ។

ខណៈ​ពេល​សួរ​នាំ អ្នក​ជិត​ខាងបានប្រាប់ថា ពួកគេបានគេងនៅ​ជាន់​ទី​២​ ក្នុង​ផ្ទះ ប៉ុន្តែ​ពួកគេមិន​ដែល​ឮ​សំឡេង​ស្រែក​ឲ្យ​គេ​ជួយ​ទេ ដូច្នេះ​ហើយបានជា​មិន​បាន​ដឹង​ថា​ មាន​នរណា​ម្នាក់​ជាប់​ក្នុង​ផ្ទះ​នេះ​អស់​រយៈពេល​៣​ថ្ងៃ​មក​ហើយនោះទេ។ ដោយពួកគេទើបដឹងរឿងក្រោយបងប្រុសម្ចាស់ផ្ទះប្រាប់ថា ប្អូនបានជាប់គាំងក្នុងផ្ទះ៣ថ្ងៃហើយ ក៏មានប៉ូលីសមកសួរនាំសុំឡើងលើផ្ទះដើម្បីផ្លោះទៅផ្ទះជនរងគ្រោះ។

នេះបើតាមការបញ្ជាក់ប្រាប់ពីមន្ត្រីប៉ូលីសបាននិយាយអោយដឹងថា៖ ម្ចាស់ផ្ទះចូលទៅបន្ទប់ទឹកមិនបានកាន់ទូរស័ព្ទចូលទៅជាមួយ ដូច្នេះមិនអាចទាក់ទងនរណាម្នាក់បានទេ ដោយសារតែសោទ្វារខូច បណ្តាលអោយជាប់ក្នុងបន្ទប់ទឹកអស់រយៈពេល៣ថ្ងៃ ហើយរស់ដោយសារផឹកទឹកម៉ាសុីន។ គួរបញ្ជាក់អោយដឹងថា៖ នាពេលបច្ចុប្បន្នជនរងគ្រោះដែលជាប់នៅក្នុងបន្ទប់ទឹកអស់រយៈពេល៣ថ្ងៃ ត្រូវបានសាច់ញាតិបញ្ជូនទៅកាន់មន្ទីរពេទ្យដើម្បីពិនិត្យក៏ដូចជាទទួលការព្យាបាលផងដែរ៕

អត្ថបទ៖ Bee
ប្រភព៖ thairath