ប្រទេសថៃបានបញ្ជាក់ពីករណីទី៧ នៃជំងឺអុតស្វា monkeypox ចេញពីអ្នកជំងឺ ដែលមិនមានប្រវត្តិធ្វើដំណើរទៅក្រៅប្រទេស
នាយកដ្ឋានគ្រប់គ្រងជំងឺរបស់ប្រទេសថៃ (DDC) បានប្រកាសថា ខ្លួនបានបញ្ជាក់ពីករណីទី៧ នៃជំងឺអុតស្វា monkeypox ចេញពីស្ត្រីជនជាតិថៃម្នាក់ ដែលមានអាយុ ៣៧ឆ្នាំ រស់នៅក្នុងទីក្រុងបាងកក នេះបើតាមការចុះផ្សាយរបស់សារព័ត៌មាន The Nation Thailand ។ អគ្គនាយករបស់ DDC លោកវេជ្ជបណ្ឌិត Opas Karnkawinpong បាននិយាយថា វិទ្យាស្ថានជំងឺឆ្លង Bamrasnaradura បានរាយការណ៍កាលពីថ្ងៃសៅរ៍ថា ស្ត្រីម្នាក់នោះបានធ្វើតេស្តវិជ្ជមានជំងឺអុតស្វា ហើយគាត់បានបង្ហើបថា អ្នកជំងឺបានរួមភេទជាមួយជនបរទេស និងមិនបានធ្វើដំណើរទៅក្រៅប្រទេសកាលពីពេលថ្មីៗនោះទេ។
អ្នកជំងឺមានអាការគ្រុនក្តៅ នៅថ្ងៃទី២០ ខែសីហា និងបានចេញពងបែកនៅថ្ងៃបន្ទាប់ ហើយរហូតដល់ ២ ថ្ងៃក្រោយមក គាត់ក៏ចេញពងបែកជាច្រើនទៀតនៅលើរាងកាយរបស់គាត់ ដែលនាំឱ្យគាត់ស្វែងរកការព្យាបាលនៅវិទ្យាស្ថានខេត្ត Nonthaburi។ ក្រុមវេជ្ជបណ្ឌិតបានធ្វើការធ្វើតេស្ត RT-PCR និងបានបញ្ជាក់ពីការឆ្លងមេរោគរបស់គាត់កាលពីថ្ងៃសុក្រ ចំណែកឯមនុស្ស ៣នាក់ ដែលបានស្និទ្ធស្នាលជាមួយអ្នកជំងឺ នឹងត្រូវតាមដានយ៉ាងដិតដល់រហូតដល់ថ្ងៃទី១១ ខែកញ្ញា។
វេជ្ជបណ្ឌិត Opas បានណែនាំឱ្យជៀសវាងការប៉ះវត្ថុរាវពីអ្នកដែលមានអាការគ្រុនក្តៅ កន្ទួល ឬពងបែក ហើយជៀសវាងការរួមភេទជាមួយអ្នកដែលមិនបានធ្វើតេស្ត។ ត្រូវពាក់ម៉ាស់មុខនៅទីសាធារណៈ ហើយលាងដៃជាប្រចាំជាមួយសាប៊ូ និងទឹក ឬអាល់កុលលាងដៃ។ លោកវេជ្ជបណ្ឌិត Opas បានដាស់តឿនថា៖«ប្រសិនបើអ្នករកឃើញពងបែក កន្ទួល ឬខ្ទុះនៅលើខ្លួនរបស់អ្នក រួមជាមួយនឹងរោគសញ្ញាដូចជា គ្រុនក្តៅ ឈឺក្បាល ឈឺសាច់ដុំ និងហើមកូនកណ្តុរ សូមធ្វើតេស្តភ្លាមៗ ឬហៅទូរស័ព្ទទៅលេខទូរសព្ទ ១៤២២ របស់ DDC»៕
អត្ថបទ៖ លីដា
ប្រភព៖ The Nation Thailand