កងកម្លាំងអ៊ុយក្រែនបានបើកការវាយលុកថ្មីមួយប្រឆាំងនឹងកងទ័ពរុស្ស៊ី នៅក្នុងតំបន់ Kherson ភាគខាងត្បូងរបស់ប្រទេសអ៊ុយក្រែន នេះបើតាមការចុះផ្សាយរបស់សារព័ត៌មាន BBC ។ ប្រព័ន្ធផ្សព្វផ្សាយបានឱ្យដឹងថា កងកម្លាំងអ៊ុយក្រែនបានបំពានខ្សែការពារដំបូងរបស់រុស្ស៊ី និងបានបង្ខំឱ្យផ្នែកខ្លះនៃកងកម្លាំងរុស្ស៊ី ត្រូវដកថយពីទីតាំងរបស់ពួកគេនៅ Kherson។ អ្នកនាំពាក្យរបស់យោធាអ៊ុយក្រែនបានប្រាប់អ្នកយកព័ត៌មានថា ការវាយប្រហារនៅលើផ្លូវដឹកជញ្ជូនភាគខាងត្បូងរបស់រុស្ស៊ី មានប្រសិទ្ធភាពដែលមិនអាចប្រកែកបាន ហើយគ្រាប់រំសេវរបស់រុស្ស៊ីជាង ១០ ទីតាំង ត្រូវបានវាយប្រហារកាលពីសប្តាហ៍មុន។

ទន្ទឹមនឹងនេះ ក្រសួងការពារជាតិរុស្ស៊ីបាននិយាយកាលពីថ្ងៃចន្ទថា ទាហានអ៊ុយក្រែនបានរងការខាតបង់យ៉ាងធ្ងន់ធ្ងរនៅក្នុងការវាយលុក ដែលមិនបានសម្រេចនៅក្នុងតំបន់ Kherson និងតំបន់ផ្សេងទៀត។ ក្រសួងក៏បាននិយាយផងដែរថា រថក្រោះ និងយន្តហោះចម្បាំងអ៊ុយក្រែនត្រូវបានបំផ្លាញ ហើយបុគ្គលិកយោធាអ៊ុយក្រែនជាង ៥៦០ នាក់បានស្លាប់។

គួរឱ្យដឹងដែរថា ទាហានរុស្ស៊ីដែលដាក់ពង្រាយនៅឧបទ្វីបគ្រីមៀ ភាគខាងត្បូងតំបន់ Kherson បានរងការវាយប្រហារដោយការបំផ្ទុះ និងការវាយលុកនាពេលថ្មីៗនេះទៅលើកន្លែងរបស់ពួកគេ ចាប់តាំងពីដើមខែសីហាមក។ រដ្ឋាភិបាលអ៊ុយក្រែនមានបំណងបង្កើនការវាយប្រហារតបតរបស់ខ្លួននៅភាគខាងត្បូង ដើម្បីដណ្តើមកាន់កាប់ទឹកដីឡើងវិញ ខណៈពេលដែលរុញច្រានជនជាតិរុស្ស៊ីនៅក្នុងតំបន់ Donbas ដោយអាវុធដែលផ្គត់ផ្គង់ដោយលោកខាងលិច៕

អត្ថបទ៖ លីដា
ប្រភព៖ BBC