ទីភ្នាក់ងារសារព័ត៌មានចិន ស៊ិនហួរ បានចុះផ្សាយនៅថ្ងៃទី២៩ ខែសីហា ឆ្នាំ២០២២ នេះថា ក្រុមការងារអង្គការសហប្រជាជាតិ កំពុងបង្កើនការឆ្លើយតបរបស់ខ្លួនចំពោះភ្លៀងធ្លាក់ខ្លាំង និងទឹកជំនន់នៅទូទាំងប្រទេសប៉ាគីស្ថាន ដែលបានសម្លាប់មនុស្សជាង ១,០០០ នាក់ នេះបើតាមអ្នកនាំពាក្យរបស់ UN បានរាយការណ៍កាលពីថ្ងៃចន្ទ។ លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិ លោក Antonio Guterres បាននិយាយថា អង្គការសហប្រជាជាតិ រួមជាមួយនឹងរដ្ឋាភិបាលប៉ាគីស្ថាន កំពុងរៀបចំការអំពាវនាវស្វែងរកទឹកប្រាក់ ១៦០ លានដុល្លារអាមេរិក សម្រាប់សកម្មភាពផ្តល់ជំនួយសង្គ្រោះបន្ទាន់ ដើម្បីបំពេញតម្រូវការរបស់អ្នកងាយរងគ្រោះបំផុត។

លោក Dujarric បានប្រាប់សន្និសីទសារព័ត៌មានប្រចាំថ្ងៃថា ការអំពាវនាវនេះនឹងត្រូវចាប់ផ្តើមនៅថ្ងៃអង្គារ ក្នុងពេលដំណាលគ្នាពីទីក្រុងហ្សឺណែវ និងទីក្រុងអ៊ីស្លាម៉ាបាដ។ លោកបាននិយាយថា អង្គការសហប្រជាជាតិប្រមូលបានថវិកាប្រហែល ៧ លានដុល្លាររួចហើយ រួមទាំងការប្តូរទិសដៅកម្មវិធី និងធនធានដែលមានស្រាប់ ដើម្បីបំពេញតម្រូវការបន្ទាន់បំផុត។ ជំនួយដែលកំពុងបន្តរួមមាន៖ ជំនួយអាហារ និងអាហារូបត្ថម្ភ ការផ្គត់ផ្គង់ និងសេវាវេជ្ជសាស្រ្ត ទឹកសុវត្ថិភាព ជំនួយសុខភាពមាតា ការចាក់វ៉ាក់សាំងបសុសត្វ និងទីជម្រក។ អ្នកនាំពាក្យរូបនេះបាននិយាយថា លើសពីនេះ មូលនិធិឆ្លើយតបគ្រោះអាសន្នកណ្តាលរបស់អង្គការសហប្រជាជាតិបានត្រៀមថវិកាចំនួន ៣ លានដុល្លារ ដើម្បីផ្តល់សេវាសុខភាព អាហារូបត្ថម្ភ អាហារ ទឹក អនាម័យ និងសេវាអនាម័យដល់អ្នកដែលត្រូវការបំផុត៕

អត្ថបទ៖ លីដា
ប្រភព៖ ស៊ីនហួរ