ថៃ៖ យោងតាមរយៈគេហទំព័រ​ហ្វេស​ប៊ុក​របស់​មជ្ឈមណ្ឌល​ហ្សែន​វេជ្ជ​សា​ស្រ្ត នៃមន្ទីរពេទ្យ​រ៉ា​ម៉ា​ធិ​បូ​ឌី បាន​បង្ហោះ​សារ​អំពី​ការ​តាមដាន​ជំងឺ​កូ​វី​ដ​១៩ “ជំនាន់​ទី​៣” អូមីក្រុង “BA.2.75.2” ដែល​វិទ្យាស្ថាន​ហ្សែ​ន​ប្រទេស​ឥណ្ឌា​បាន​ព្រមាន​ថា អូមីក្រុង BA.2.75 ​បាន​ចាប់ផ្តើម​ក្នុង ប្រទេសឥណ្ឌាចាប់តាំងពីខែឧសភា មានចំនួន ៨២.៩% នៃករណីថ្មីរបស់មេរោគប្រភេទ BA.2.75 ដែលមានឈ្មោះមិនទាន់ផ្លូវការគឺ Centaurus។

ហើយវាថែមទាំងមានសក្ដានុពលបំផុតសម្រាប់ការបំលែងថ្មី បើប្រៀបធៀបទៅនឹងមេរោគប្រភេទកូរ៉ូណា ២០១៩ ដែលធ្លាប់ជាមេរោគបំលែងថ្មី បានផ្ទុះកាលពីមុន ប៉ុន្តែឥឡូវនេះមេរោគ អូមីក្រុង BA.2.75 ត្រូវបានផ្លាស់ប្តូរឬបំលែងថ្មីជាបន្តបន្ទាប់ ដោយមួយក្នុងចំនោមប្រភេទរង ដែលបានផ្លាស់ប្តូរគឺ “BA.2.75.2” ត្រូវបានគេស្គាល់ក្រៅផ្លូវការថា “Centaurus 2.0” ព្រោះវាជាកូនទីពីររបស់ BA.2.75 ដោយកូនទីមួយគឺ BA.2.75.1 ។

តាមរយៈអ្នកជំនាញខាងភាពស៊ាំមកពីសាកលវិទ្យាល័យប៉េកាំងបានកំណត់អត្តសញ្ញាណ អូមីក្រុង BA.2.75.2 ថាជាប្រភេទមេរោគបំលែងដែលអាចគេចពីភាពស៊ាំបានយ៉ាងល្អបំផុតក្នុងពេលបច្ចុប្បន្ន ហើយវាថែមទាំងអាចបណ្តាលឱ្យមានការរីករាលដាលបន្ថែមទៀតនាពេលអនាគត។

ជាមួយគ្នានេះដែរមជ្ឈមណ្ឌល Genome ក៏បានបញ្ជាក់បន្ថែមទៀតថា អូមីក្រុង BA.2.75 ដែលបានផ្លាស់ប្តូរពី BA.2 ត្រូវបានចាត់ទុកថា ជាជំនាន់ទី២ ដោយបានបំលែងចេញពីមេរោគដើម ឬ Wuhan។ ខណៈដែល អូមីក្រុង BA.2.75.2 នេះ មានការផ្លាស់ប្តូរពី BA.2.75 ត្រូវបានចាត់ទុកថាជា ការផ្លាស់ប្តូរជំនាន់ទី៣ ពីវីរុស Wuhan បើប្រៀបធៀបទៅនឹងការផ្ទុះឡើងនៃ BA.2.75 នៅក្នុងប្រទេសឥណ្ឌា ដែលការផ្ទុះដំបូងបានកើតឡើងនៅក្នុងប្រទេសឥណ្ឌា ហើយបានរីករាលដាលដល់ប្រទេសឈីលី ចក្រភពអង់គ្លេស សិង្ហបុរី អេស្ប៉ាញ អាល្លឺម៉ង់ និងប្រទេសថៃ។

ចំណែក អូមីក្រុង BA.2.75.2 គឺមានប្រៀបក្នុងការរីករាលដាលដល់ទៅ ៩០% បើធៀបជាមួយនឹង BA.5 និង ១៤៨% បើធៀបនឹង BA.4 នៅទូទាំងពិភពលោក។ ខណៈពេលដែលលោកវេជ្ជបណ្ឌិត Supakit Sirilak អគ្គនាយកនៃនាយកដ្ឋានវិទ្យាសាស្ត្រវេជ្ជសាស្ត្របាននិយាយថា ការផ្លាស់ប្តូរទៅជា អូមីក្រុង BA.2.75.2 គឺជារឿងធម្មតា ព្រោះមេរោគកំពុងផ្លាស់ប្តូរគ្រប់ពេលវេលា រហូតមកទល់នឹងពេលនេះមិនបានរកឃើញបញ្ហាទេ។

ចំពោះ​ប្រភេទ​ដែល​កំពុង​រាតត្បាត​នៅ​ប្រទេស​ថៃ​នៅ​តែ​ជា​ប្រភេទ BA.5 គឺ​គ្មាន​អ្វី​អាច​ជំនួស​បាន​ឡើយ ដូចនេះ នាយកដ្ឋានវិទ្យាសាស្ត្របានតាមដានប្រភេទរងផ្សេងៗ រួមគ្នាជាមួយអ្នកវិទ្យាសាស្ត្រជុំវិញពិភពលោកថា BA.2.75.2 នឹងរីករាលដាលយ៉ាងឆាប់រហ័សឬអត់។

គួរបញ្ជាក់អោយដឹងផងដែរថា៖ ស្ថានភាពជំងឺកូវីដ-១៩ នៅប្រទេសថៃ រកឃើញករណីថ្មីចំនួន ៦១៩ ករណីស្លាប់ ១០ នាក់បន្ថែមទៀត អ្នកឆ្លងសរុប ៤ ៦៦៨ ៨៦៣ នាក់ ជាសះស្បើយ ៤ ៦២៦ ០៣៤នាក់ អ្នកស្លាប់កើនឡើង ៣២ ៥៦៤នាក់ ខណៈស្ថានភាពពិភពលោក មានករណីសរុបចំនួន ៦១៤,២២៥,៨២៤ ករណី និងការស្លាប់សរុបចំនួន ៦,៥១៧,៨៨៦ នាក់។

អត្ថបទ៖ Bee
ប្រភព៖ Thirath