ការិយាល័យកិច្ចការបរទេសរបស់ចក្រភពអង់គ្លេស បាននិយាយថា រាជទាយាទអារ៉ាប៊ីសាអូឌីត គឺព្រះអង្គម្ចាស់ Mohammed Bin Salman មិនត្រូវបានរំពឹងថា នឹងចូលរួមព្រះរាជពិធីបុណ្យសពរបស់ម្ចាស់ក្សត្រី Elizabeth II នោះទេ។ ប្រភព​ដែល​បាន​ដក​ស្រង់​សម្តី​ដោយ រ៉យទ័រ បាន​និយាយ​ថា ​ការ​ផ្លាស់​ប្តូរ​នេះ​ត្រូវ​បាន​ធ្វើ​ឡើង​ដោយភាគី​អារ៉ាប៊ីសាអូឌីត។ មុននេះ ក្រុម​សិទ្ធិមនុស្ស​ក៏បានធ្វើការ​រិះគន់យ៉ាងខ្លាំង លើ​ការសម្រេចចិត្ត​អញ្ជើញ​ព្រះអង្គម្ចាស់​របស់​អារ៉ាប៊ីសាអូឌីតអង្គនេះ ខណៈដែលទ្រង់ត្រូវបានលោកខាងលិចចោទប្រកាន់ថា បានបញ្ជាឱ្យមានការសម្លាប់អ្នកកាសែតអារ៉ាប៊ីសាអូឌីតលោក Jamal Khashoggi ក្នុងឆ្នាំ២០១៨។

ទ្រង់បាន​បដិសេធ​ការ​ចោទ​ប្រកាន់នេះ ប៉ុន្តែ​ទ្រង់​ត្រូវ​បានលោក​ខាង​លិចមើលមកថា ​ជា​ជន​អគតិម្នាក់ ហើយទ្រង់​មិន​ដែលបាន​យាងទៅ​កាន់​អង់គ្លេស​នោះទេ ចាប់​តាំង​ពី​​ឃាតកម្ម​លើលោក Jamal Khashoggi នៅ​ក្នុង​ស្ថាន​កុងស៊ុល​អារ៉ាប៊ីសាអូឌីត ​ក្នុង​ទីក្រុង​អ៊ីស្តង់ប៊ុល ប្រទេសទួរគីកាលពីឆ្នាំ២០១៨​។ យ៉ាងណា ព្រះអង្គម្ចាស់ Turki al-Faisal ដែលជារាជវង្សអារ៉ាប៊ីសាអូឌីតជាន់ខ្ពស់ម្នាក់ទៀត ត្រូវបានគេរំពឹងថា នឹងចូលរួមក្នុងពិធីបុណ្យសពជំនួសវិញ។ ចំណែកការអញ្ជើញប្រទេសចិន ក៏ទទួលរងការរិះគន់ផងដែរ ដោយសារប្រទេសចិនមានរឿងអាស្រូវ បំពានកម្លាំងពលកម្មលើជនជាតិអ៊ុយហ្គួរមូស្លីមនៅស៊ីនជាំង។ ប៉ុន្តែប្រទេសចិនបានបញ្ជាក់ថា ខ្លួនកំពុងបញ្ជូនអនុប្រធានាធិបតីរបស់ខ្លួន គឺលោក Wang Qishan ឱ្យទៅចូលរួមព្រះរាជពិធីបុណ្យសពនោះ៕

អត្ថបទ៖ លីដា
ប្រភព៖ BBC