នាយកដ្ឋានសុខាភិបាលទីក្រុងហូជីមិញបានរាយការណ៍នៅថ្ងៃព្រហស្បតិ៍នេះថា ស្ត្រីម្នាក់ដែលត្រឡប់មកពីទីក្រុងឌូបៃ ត្រូវបានគេធ្វើតេស្ត និងធ្វើរោគវិនិច្ឆ័យឃើញថា មានជំងឺអុតស្វា Monkeypox ដែលធ្វើឱ្យគាត់ក្លាយជាករណីទី២ ដែលត្រូវបានរកឃើញនៅក្នុងប្រទេសវៀតណាម។ ស្ត្រីម្នាក់នោះមានអាយុ ៣៨ឆ្នាំ មកពីខេត្ត Tuyen Quang ភាគខាងជើង និងបានធ្វើដំណើរទៅកាន់ទីក្រុងឌូបៃ ចាប់ពីថ្ងៃទី២៩ ខែកញ្ញា ដល់ថ្ងៃទី១៨ ខែតុលា ហើយមានរោគសញ្ញាដូចជាគ្រុនក្តៅ ចង្អោរ និងពងបែក តាំងពីថ្ងៃទី១១ ខែតុលា។ គាត់ និង​អ្នក​​ជំងឺអុតស្វាដំបូងរបស់វៀតណាម គឺជាមិត្តនឹងគ្នា ហើយពួកគេបាន​ស្នាក់​នៅ​ជាមួយ​គ្នា​ក្នុង​កន្លែង​ស្នាក់​នៅ​តែ​មួយ​ក្នុង​ទីក្រុង​ឌូបៃ។

អាជ្ញាធរ និងក្រុមគ្រូពេទ្យនៅអាកាសយានដ្ឋាន Tan Son Nhat បានយកស្ត្រីនោះទៅដាក់ឱ្យនៅដាច់ដោយឡែក បន្ទាប់ពីគាត់មកដល់អាកាសយានដ្ឋានដើម្បីធ្វើតេស្ត។ បន្ទាប់មកគាត់ត្រូវបានគេនាំទៅមន្ទីរពេទ្យក្រុងហូជីមិញ ដើម្បីធ្វើរោគវិនិច្ឆ័យ និងព្យាបាល។ ទីក្រុងហូជីមិញក៏នឹងបន្តតាមដានអ្នកដែលមានទំនាក់ទំនងផ្ទាល់ជាមួយអ្នកជំងឺ ដើម្បីកាត់បន្ថយហានិភ័យនៃការរីករាលដាល ខណៈយន្ដហោះដែលគាត់បានជិះត្រូវបានបាញ់ថ្នាំសម្លាប់មេរោគ។ អ្នកជំងឺបានធ្វើតេស្ដ PCR និងបានរកឃើញថាវិជ្ជមានជាមួយជំងឺអុតស្វា នៅថ្ងៃទី១៩ ខែតុលា។

គួរឱ្យដឹងដែរថា មនុស្សជាង ៥៧,០០០ នាក់ ត្រូវបានបញ្ជាក់ថា បានកើតជំងឺអុតស្វានៅទូទាំងប្រទេស និងដែនដីចំនួន ៩២ នៅក្នុងពិភពលោក ហើយក្នុងនោះមានអ្នកជំងឺចំនួន ២២ នាក់បានស្លាប់ គិតត្រឹមថ្ងៃទី១៣ ខែកញ្ញា។ កន្លងមក អង្គការសុខភាពពិភពលោក ក៏បានហៅការផ្ទុះឡើងនៃជំងឺអុតស្វាថាជា «អាសន្នសុខភាពជាសាកល» ផងដែរ៕

អត្ថបទ៖ លីដា
ប្រភព៖ VNExpress