ស្នងការដ្ឋាននគរបាលរាជធានីភ្នំពេញ បញ្ជាក់ថា ករណីគ្រោះថ្នាក់ចរាចរណ៍នៅលើស្ពានជ្រោយចង្វារ គឺសមត្ថកិច្ចមិនបានចាប់ដៃជនរងគ្រោះមកផ្តិតមេដៃឡើយ (មានវីដេអូ)
រាជធានីភ្នំពេញ៖ នាព្រឹកថ្ងៃទី០៨ ខែធ្នូ ឆ្នាំ២០២២ ស្នងការដ្ឋាននគរបាលរាជធានីភ្នំពេញ បានធ្វើការបញ្ជាក់ថា ស្ត្រីរងគ្រោះ ដោយសារគ្រោះថ្នាក់ចរាចរណ៍នៅលើស្ពានជ្រោយចង្វារ គឺសមត្ថកិច្ចមិនបានចាប់ដៃជនរងគ្រោះមកផ្តិតមេដៃឡើយ។ យោងតាមការបញ្ជាក់ពី ស្នងការដ្ឋាននគរបាលរាជធានីភ្នំពេញ បានឲ្យដឹងថា៖
«សូមបងប្អូនប្រជាពលរដ្ឋ ស្តាប់សម្លេងដែលបញ្ជាក់ការពិតរបស់អ្នកគ្រូពេទ្យ ដែលជាម្ចាស់គ្លីនិកឯកជន ដែលបានព្យាបាលជនរងគ្រោះឈ្មោះ ម៉ុច សហរីល័ក្ខ ដែលជួបគ្រោះថ្នាក់ចរាចរណ៍ នៅលេីស្ពានជ្រោយចង្វារ កាលពីថ្ងៃទី០៥ ខែធ្នូ ឆ្នាំ២០២២។
នេះជាម្តីបញ្ជាក់របស់អ្នកគ្រូពេទ្យដែលជាម្ចាស់គ្លីនិកពន្លឺ ដែលជនរងគ្រោះឈ្មោះ ម៉ុច សហរីល័ក្ខ បានទៅសម្រាកព្យាបាលរបួស បន្ទាប់រងគ្រោះក្នុងហេតុការណ៍គ្រោះថ្នាក់ចរាចរណ៍កាលពីថ្ងៃទី០៥ ខែធ្នូ ឆ្នាំ២០២២ វេលាម៉ោង ០២ និង១០នាទី នៅលេីស្ពានជ្រោយចង្វារចាស់ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
ដោយអ្នកគ្រូពេទ្យបានបញ្ចាក់ថា អ្នករបួសមិនបានសន្លប់ដូចដែលលេីកឡេីងប្រាប់សាព័ត៌មាន TVFB នោះទេ គឺគាត់មានស្មារតីគ្រប់គ្រាន់ និងបានដេីរចូលមកពិនិត្យព្យាបាលដោយខ្លួនឯង មិនមានការសែងចូលនោះទេ មានន័យថាជនរងគ្រោះត្រឹមរងរបួសភ្នែក ក្បាល និងត្រង់ក ។ ម៉្យាងទៀតក៏មានមនុស្សដែលស្គាល់គ្នាចំនួន២នាក់ នៅជាមួយជនរងគ្រោះជាប់រហូត ហេីយក៏គ្មានហេតុផលណាមួយដែលសមត្ថកិច្ច ត្រូវចាប់ដៃជនរងគ្រោះមកផ្តិតមេដៃនោះទេ ។ ទាំងនេះហេីយ ជាការបំភ្លឺការពិតរបស់អ្នកគ្រូពេទ្យ ដែលបានព្យាបាលឈ្មោះ ម៉ុច ស្រីល័ក្ខ »៕