កុមារ​​ប្រមាណ ៣០នាក់ នៅក្នុងទីក្រុងបាងកក បាន​​ពុល​អាហារភ្លាមៗបន្ទាប់​ពី​បានហូបមីឆា ដែលគេចែកឱ្យ​ដោយ​ឥត​គិត​ថ្លៃ​ នៅក្នុងថ្ងៃ​ទិវា​កុមារ កាល​ពី​ថ្ងៃ​សុក្រកន្លងទៅនេះ​។ ប្រភព The Thaiger បាននិយាយថា រថយន្ត​សង្គ្រោះ​ជាង ១០​គ្រឿង​ ត្រូវបានបញ្ជូន​ជាបន្ទាន់ ទៅ​កាន់​សាលា​វត្ត​ណាក់និមិត្ត ផ្លូវ​សួស​សុខសាវ៉ាតលេខ ១៤ បន្ទាប់ពីទទួលរបាយការណ៍​ថា កុមារមានអាការ​ចង្អោរ ក្អួត រាក និង​ឈឺក្បាល។ សិស្សស្រីម្នាក់បានអះអាងថា កុមារទាំងនោះបានទទួលមីឆា ជាមួយក្តាម សាច់ក្រក ស៊ុត និងស្ពៃក្តោប ពីអ្នកលក់អាហារម្នាក់ ហើយក្រោយមកពួកគេក៏ចាប់ផ្តើមឈឺ។

ប្រព័ន្ធ​ផ្សព្វផ្សាយ​ថៃ​បាន​រាយការណ៍​ថា អ្នក​ដែល​ផ្តល់​អាហារ​ឥតគិតថ្លៃ​ដល់​កុមារ​ទាំងនោះ ​មានឈ្មោះ Wantanee ខណៈអ្នកលក់អាហារម្នាក់នោះ ទទួលបានមីកញ្ចប់ដោយឥតគិតថ្លៃពីវត្តមួយផ្សេងទៀត ជាមួយនឹងគ្រឿងផ្សំ ដែលឧបត្ថម្ភដោយមនុស្សដទៃទៀត។ នាង​និយាយ​ថា គ្រឿង​ផ្សំ​ខ្លះ​គឺគាត់​បានទិញ​ពី​ផ្សារ​ស្រស់ៗ។ នាង Wantanee បាននិយាយថា នាងជាអ្នកលក់អាហារជាច្រើនឆ្នាំមកហើយ ហើយនាងជឿជាក់ថា គ្រឿងផ្សំទាំងអស់គឺស្អាតល្អ។ នាង​បាន​និយាយ​ថា​ នាង​ក៏មាន​ការ​ព្រួយ​បារម្ភ​ផងដែរ ព្រោះសាលា​ និង​ឪពុក​ម្តាយរបស់កុមារទាំងនោះ ​អាចនឹង​ដាក់​ពាក្យ​ប្តឹង​រូបនាង ស្របពេលដែលនាងមានចេតនាល្អប៉ុណ្ណោះ សម្រាប់ឱកាសទិវាកុមារនេះ។

យ៉ាងណាក៏ដោយ នាយកសាលា Darasamuth Phuket បានចេញសេចក្តីថ្លែងការណ៍អំពីឧបទ្ទវហេតុនេះ ដោយនិយាយថា បញ្ហានេះ គឺដោយសារតែប្រព័ន្ធទឹករបស់សាលាឯនោះទេ។ លោកនាយក​បាន​និយាយ​ថា សិស្ស​មួយ​ចំនួន​ផ្សេងទៀតដែលមិនបានហូបមីឆា ក៏មាន​ជំងឺអាការ​រាកដូចគ្នាដែរ។ បន្ទាប់ពីធ្វើសំណាកអាហារ និងទឹកផឹករបស់សាលានៅមន្ទីរពិសោធន៍ ពួកគេបានរកឃើញថា ទឹករបស់សាលាពិតជាមានបាក់តេរី coliform ដែលធ្វើឱ្យកុមាររាកពិតមែន៕

អត្ថបទ៖ លីដា
ប្រភព៖ The Thaiger