អាមេរិកបន្ថែមជំនួយ ៣៨លានដុល្លារ សម្រាប់ឆ្លើយតបនឹងជំងឺអេបូឡា ក្រោយអ្នកជំនាញព្រមានថា អេបូឡាអាចនឹងផ្ទុះការរាតត្បាតខ្លាំងដូចកាលពីឆ្នាំ ២០១៤

អាមេរិក៖ រដ្ឋាភិបាលអាមេរិកសម្រេចផ្តល់ជំនួយបន្ថែមចំនួន ៣៨លានដុល្លារ ដើម្បីឆ្លើយតបនឹងការរាតត្បាត​នៃជំងឺអេបូឡា នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៦ ខែមិថុនា។ ការសម្រេចផ្តល់ជំនួយបន្ថែមនេះត្រូវបានធ្វើឡើងក្រោយអាជ្ញាធរសុខាភិបាលអាមេរិកបានមើលឃើញថា ជំងឺអេបូឡាអាចនឹងរាតត្បាតខ្លាំងដូចកាលពីអំឡុងឆ្នាំ ២០១៤-២០១៦ កន្លងទៅ ដែលបានបណ្តាលឱ្យមានពលរដ្ឋនៅតំបន់អាហ្វ្រិកខាងលិចប្រមាណជា ១១,៣១០នាក់ត្រូវស្លាប់បាត់បង់ជីវិត។

គួរបញ្ជាក់ជូនថា គិតត្រឹមពេលនេះជំងឺអេបូឡាកំពុងតែរាតត្បាតខ្លាំងនៅក្នុងប្រទេសសាធារណរដ្ឋ​ប្រជាធិបតេយ្យ​កុងហ្គោ (DRC) ដែលបានបណ្តាលឱ្យមានអ្នកឆ្លងសរុបចំនួន ៤៥២ករណី​ ខណៈនៅក្នុងនោះមាន ៨២ករណីបានបណ្តាលឱ្យអ្នកជំងឺត្រូវស្លាប់បាត់បង់ជីវិតផងដែរ។ ប្រភពខាងលើបន្តថា ការសម្រេចផ្តល់ជំនួយបន្ថែមចំនួន ៣៨លានដុល្លារពីសំណាក់សហរដ្ឋអាមេរិកនៅពេលនេះ​ គឺបានធ្វើឱ្យប្រាក់ជំនួយសរុប ដែលអាមេរិកបានផ្តល់ដោយផ្ទាល់ទៅកាន់អង្គការសុខភាពពិភពលោកបានកើនឡើងដល់ជាង ២០០លានដុល្លារហើយ៕ 

អត្ថបទ៖ ភក្តី

ប្រភព៖ The Strait Time