រដ្ឋាភិបាលឥណ្ឌូណេស៊ីបានជំរុញឱ្យអាជ្ញាធរសុខាភិបាលក្នុងតំបន់ ត្រូវត្រួតពិនិត្យគ្រឹះស្ថានម្ហូបអាហារ និងស្នើឱ្យមាតាបិតាមានការប្រុងប្រយ័ត្ន បន្ទាប់ពីមានសេចក្តីរាយការណ៍ថា កុមារប្រមាណជា ២៥នាក់ បានធ្លាក់ខ្លួនឈឺក្រោយហូបនំមួយប្រភេទ ដែលមានផ្ទុកសារធាតុនីត្រូហ្សែនរាវ (liquid nitrogen-infused)។ នំប្រភេទនេះត្រូវបានគេហៅថា chiki ngebul ឬ នំដង្ហើមនាគ គឺជានំផ្អែមមានចម្រុះពណ៌ ដែលត្រូវបានស្រោបដោយផ្សែងនីត្រូហ្សែន ហើយពួកគេក៏បានស្រូបហឺតផ្សែងទាំងនោះចូលក្នុងពោះ តាមរយៈច្រមុះ និងមាត់របស់ពួកគេ។ អាហារសម្រន់ប្រភេទនេះ បានវាយលុកយ៉ាងខ្លាំងលើប្រព័ន្ធផ្សព្វផ្សាយសង្គម ជាពិសេសនៅក្នុងចំណោមក្មេងៗតូចតែម្ដង។

នៅក្នុងសេចក្តីថ្លែងការណ៍កាលពីពេលថ្មីៗនេះ ក្រសួងសុខាភិបាលឥណ្ឌូនេស៊ីបានលើកឡើងពីគ្រោះថ្នាក់នៃការទទួលទានអាហារសម្រន់ប្រភេទនេះ ដោយខ្លួនបានពន្យល់ថា ការទទួលទាននំប្រភេទនេះក្នុងរយៈពេលយូរ អាចនាំឱ្យមានបញ្ហាសុខភាពធ្ងន់ធ្ងរ។ ក្រសួង​បាន​ព្រមាន​ថា ការ​ទទួលទាន​អាហារ​សម្រន់​ដែល​បញ្ចូល​ជាតិនីត្រូហ្សែន​ច្រើន​ពេក អាច​នាំ​ឱ្យ​រលាក​ក្រពះ រលាក រលាក​ស្បែកដោយសារភាពត្រជាក់ខ្លាំង (cold burn) ព្រម​ទាំង​ខូចខាត​ដល់​សរីរាង្គ​ខាងក្នុង។ ម្យ៉ាងវិញទៀត ការ​ស្រូប​ផ្សែង​ក្នុង​រយៈ​ពេល​យូរ​ ក៏​អាច​នាំ​ឱ្យ​មាន​ការ​ពិបាក​ដក​ដង្ហើម​ធ្ងន់ធ្ងរ​ផងដែរ។ គិតមកទល់ពេលនេះ កុមារ​ចំនួន ២៥នាក់​ បាន​រង​ផល​ប៉ះពាល់ដល់សុខភាព ​បន្ទាប់​ពី​បាន​ហូប​អាហារ​សម្រន់ ដោយ​ក្នុង​នោះកុមារ ២​នាក់ ​ត្រូវ​បញ្ជូនទៅ​ព្យាបាល​នៅ​មន្ទីរពេទ្យ៕

អត្ថបទ៖ លីដា
ប្រភព៖ Channel News Asia