កាសែតដ៏ធំរបស់ចិន South China Morning Post បានសរសេរថា ដើមកំណើតក្បាច់ប្រដាល់ម៉ឺយថៃ គឺចេញពីគុនខ្មែរ
- January 24, 2023
ប៉ុន្មានថ្ងៃចុងក្រោយនេះ មានរឿងចម្រូងចម្រាសជាច្រើនពាក់ព័ន្ធនឹងការសម្រេចប្រើពាក្យ «គុនខ្មែរ» របស់កម្ពុជាដែលជាម្ចាស់ផ្ទះ សម្រាប់វិញ្ញាសារប្រដាល់សេរី ប៉ុន្តែភាគីថៃបានកើតទុកមិនសុខចិត្ត ដោយសារកន្លងមកពួកគេប្រើពាក្យ «ម៉ឺយថៃ» ។ គួរឱ្យដឹងដែរថា កម្ពុជាគ្រោងនឹងធ្វើជាម្ចាស់ផ្ទះស៊ីហ្គេមនៅឆ្នាំ២០២៣ ហើយកម្ពុជាបានសម្រេចប្រើពាក្យថា «គុនខ្មែរ» នៅក្នុងវិញ្ញាសារប្រដាល់សេរី ដែលធ្វើឱ្យភាគីថៃបធិសេធលើការសម្រេចចិត្តនេះ ហើយថែមទាំងព្រមាននឹងមិនបញ្ជូនអ្នកតំណាងរបស់ពួកគេ មកប្រកួតនៅក្នុងវិញ្ញាសារនេះ នៅព្រឹត្តិការណ៍ស៊ីហ្គេមឆ្នាំ២០២៣ ដែលកម្ពុជានឹងត្រូវធ្វើជាម្ចាស់ផ្ទះទៀតផង។
យោងតាម ក្រសួងព័ត៌មាន បានឱ្យដឹងថា ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡា អាស៊ី អាគ្នេយ៍ លើកទី៣២ ឆ្នាំ២០២៣ (CAMSOC) បានអះអាងថា ក្នុងនាមជាម្ចាស់ផ្ទះស៊ីហ្គេមលើកទី៣២ ឆ្នាំ២០២៣ កម្ពុជាបានជម្រាបដំណឹងពាក់ព័ន្ធនឹងការប្រើប្រាស់ពាក្យគុនខ្មែរ ជំនួសឱ្យពាក្យម៉ឺយ ជូនដល់គណៈកម្មាធិការ អូឡាំពិកនៃប្រទេសអាស៊ានទាំងអស់។ ឯកឧត្តមបានបន្ថែមថា នេះជាការប្រកាសជំហររបស់កម្ពុជា ក្នុងការសម្រេចប្រើប្រាស់ឈ្មោះ «ប្រដាល់គុនខ្មែរ» ដើម្បីកុំឱ្យមានភាពច្របូកច្របល់ ឬការប្រកាន់ក្នុងការប្រើពាក្យ «ម៉ឺយ» ។ វាក៏ជាកិត្តិយសរបស់ ម្ចាស់ផ្ទះកម្ពុជា ស្របនឹងឆន្ទៈរួមរបស់ប្រជាពលរដ្ឋកម្ពុជា ដែលម្ចាស់ក្បាច់ប្រដាល់គុនខ្មែរផងដែរ។
ថៃតែងតែគិតថា ម៉ឺយថៃគឺជាក្បាច់គុនបុរាណពីដូនតារបស់ពួកគេ ក៏ប៉ុន្តែក្បាច់គុននេះ គឺមានដើមកំណើតចេញពីល្បុកតោរបស់ខ្មែរ ហើយសូម្បីកាសែតដ៏ធំមួយរបស់ចិន ក៏ធ្លាប់បានបកស្រាយលម្អិតពីវាផងដែរ។ យោងតាម South China Morning Post បាននិយាយថា ល្បុក្កតោបុរាណរបស់ខ្មែរ (Bokator/L’bokator) គឺជាក្បាច់គុនចំណាស់ជាងគេនៅអាស៊ីអាគ្នេយ៍នេះ ប៉ុន្តែវាស្ទើរតែរលត់ទៅវិញទាំងស្រុង ដោយភ្លើងសង្គ្រាមនៅជំនាន់ប៉ុលពត ដែលធ្វើឱ្យប្រជាជនខ្មែរនៅតែមានអារម្មណ៍ដក់ជាប់ និងភ័យខ្លាចបំផុត ទោះបីជាវាកន្លងទៅជាង ៤០ឆ្នាំហើយក្ដី។ សព្វថ្ងៃល្បុក្កតោនៅរស់រានមានជីវិតបាន នេះគឺត្រូវអរគុណដល់លោកគ្រូក្បាច់គុនមួយចំនួន ដែលខិតខំដែររក្សា និងបង្ហាត់ក្បាច់គុននេះដល់សិស្សជំនាន់ក្រោយម្តងទៀត។
ល្បុក្កតោគឺជាក្បាច់គុនបុរាណដ៏ចំណាស់ ដែលមានអាយុកាលប្រហែលជា ២,០០០ឆ្នាំ មកហើយ។ វាជាក្បាច់គុនប្រើកែងដៃ និងជង្គង់ជាមូលដ្ឋាន ដែលបង្កើតដោយជនជាតិខ្មែរ នៅលើទឹកដីខ្មែរ តាំងតែពីមុនការមកដល់នៃអរិយធម៌ឥណ្ឌាមកម្ល៉េះ។ ក្បាច់គុននេះក៏ទំនងជាកើតឡើងដំណាលគ្នានឹងការកកើតទឹកដីខ្មែរផងដែរ នេះបើតាមរឿងព្រេងនិទានខ្មែរ។ ក្បាច់គុននេះយកលំនាំតាមតថភាពមនុស្សសម័យបុរាណ ក៏ដូចជាកាយវិការរបស់សត្វ ដោយសារថា កាលនៅជំនាន់នោះ ខ្មែរយើងយកល្បុក្កតោមកការពារខ្លួនពីសត្រូ សត្វសាហាវ និងប្រើក្នុងសមរភូមិ ល ។
ល្បុក្កតោ មានន័យថា «វាយតោ» ពោលគឺ «បុក» មានន័យថា «វាយ» ឬក្បាច់គុន ហើយ ពាក្យ «តោ» មានន័យថា «សត្វតោ» ឬ អនុភាព។ សរុបមក ល្បុក្កតោ មានន័យថា ជាកំពូលក្បាច់គុនប្រកបដោយអនុភាព ឬក្បាច់គុនខ្លាំងដូចសត្វតោ។ រហូតមកដល់បច្ចុប្បន្ន សូម្បីតែប្រដាល់សេរីខ្មែរ ឬ ម៉ឺយថៃ (Muay Thai) ក៏សុទ្ធតែមានដើមកំណើតចេញពីក្បាច់គុននេះ។ ភស្តុតាងជាក់ស្តែងនៃប្រវត្តិក្បាច់គុននេះ ត្រូវបានប្រវត្តិវិទូរកឃើញថា មានឆ្លាក់នៅតាមជញ្ជាំងប្រាសាទតាំងពីសតវត្សរ៍ទី៩ ដូចជាប្រាសាទព្រះគោ បន្ទាយស្រី អង្គរវត្ត និងបាពួន៕
អត្ថបទ៖ លីដា
ប្រភព៖ SCMP
- Share This Post: