មេដឹកនាំកូរ៉េខាងជើង គីម ជុងអ៊ុន បានផ្ញើសារបញ្ជាក់ពីការប្តេជ្ញាចិត្តគាំទ្រលោក វ្ល៉ាឌីមៀ ពូទីន នៅចំថ្ងៃទិវាជាតិរបស់រុស្ស៊ី

ប្រព័ន្ធផ្សព្វផ្សាយរដ្ឋ KCNA នៅថ្ងៃចន្ទ ទី១២ ខែមិថុនា បានរាយការណ៍ថា មេដឹកនាំកូរ៉េខាងជើងលោក លោក គីម ជុងអ៊ុន បានប្តេជ្ញាថានឹង «កាន់ដៃគ្នា» ជាមួយប្រធានាធិបតីរុស្ស៊ីលោក លោក វ្ល៉ាឌីមៀ ពូទីន ហើយជំរុញកិច្ចសហប្រតិបត្តិការយុទ្ធសាស្ត្រលើគោលដៅរួមគ្នា ដើម្បីការកសាងប្រទេសដ៏មានឥទ្ធិពល។ លោក គីម បានសរសេរសារមួយទៅកាន់លោក ពូទីន នៅថ្ងៃទិវាជាតិរបស់រុស្ស៊ី ដោយបានបង្ហាញពី «ការគាំទ្រពេញលេញ និងសាមគ្គីភាព» សម្រាប់រុស្ស៊ី។

លោក គីម បាននិយាយនៅក្នុងសារដែលចេញផ្សាយដោយ KCNA ថា៖«យុត្តិធម៌គឺប្រាកដថានឹងឈ្នះ ហើយប្រជាជនរុស្ស៊ីនឹងបន្តបន្ថែមសិរីរុងរឿងដល់ប្រវត្តិសាស្រ្តនៃជ័យជំនះរបស់ខ្លួន»។ លោក គីម បានអំពាវនាវឱ្យមាន «កិច្ចសហប្រតិបត្តិការយុទ្ធសាស្ត្រកាន់តែជិតស្និទ្ធ» ជាមួយទីក្រុងមូស្គូ «កាន់ដៃយ៉ាងរឹងមាំជាមួយប្រធានាធិបតីរុស្ស៊ី ដោយអនុលោមតាមបំណងប្រាថ្នារួមរបស់ប្រជាជននៃប្រទេសទាំង ២ ដើម្បីសម្រេចបាននូវគោលដៅធំនៃការកសាងប្រទេសដ៏មានឥទ្ធិពលមួយ»។

កូរ៉េខាងជើងបានព្យាយាមបង្កើតទំនាក់ទំនងកាន់តែជិតស្និទ្ធជាមួយវិមានក្រឹមឡាំង និងគាំទ្រទីក្រុងមូស្គូ បន្ទាប់ពីខ្លួនបានលុកលុយអ៊ុយក្រែនកាលពីឆ្នាំមុន ដោយបានបន្ទោសលើគោលនយោបាយអនុត្តរភាព និងការប្រើប្រាស់អំណាច របស់សហរដ្ឋអាមេរិក និងលោកខាងលិច៕

អត្ថបទ៖ លីដា
ប្រភព៖ Channel News Asia