ក្រសួងសុខាភិបាលថៃចេញការព្រមានពីជំងឺគ្រុនឈាម ខណៈការឆ្លងបានកើនឡើងដល់កម្រិតខ្ពស់បំផុតរយៈពេល ៣ឆ្នាំ
ក្រសួងសុខាភិបាលថៃ បានព្រមានប្រជាពលរដ្ឋរបស់ខ្លួនឱ្យមានការប្រុងប្រយ័ត្នចំពោះសត្វមូស ខណៈករណីជំងឺគ្រុនឈាមកំពុងមានការកើនឡើង។ អ្នកនាំពាក្យរដ្ឋាភិបាលថៃ លោកស្រី Traisuree Taisaranakul បាននិយាយថា ប្រទេសថៃបានកត់ត្រាជំងឺគ្រុនឈាមចំនួន ១៨,១៧៣ ករណី ពីខែមករាដល់ខែឧសភាឆ្នាំនេះ ដែលជាការកើនឡើង ៤.២ ដង ធៀបនឹងរយៈពេលដូចគ្នាកាលពីឆ្នាំមុន និងជាចំនួនខ្ពស់បំផុតក្នុងរយៈពេល ៣ឆ្នាំ។ ការឆ្លងជាមធ្យមគឺ ៩០០ ករណី ក្នុងមួយសប្តាហ៍ និងបានបណ្តាលឱ្យមានអ្នកស្លាប់ ១៥នាក់ ក្នុងអំឡុងខែមករាដល់ខែឧសភា។
ទីក្រុងបាងកក មានចំនួនអ្នកឆ្លងច្រើនជាងគេ បន្ទាប់មកគឺខេត្តត្រាត ណាន ចាន់ថាបុរី រ៉ាយ៉ង និងម៉ាហុងសុន។ ហើយក្រុមអាយុដែលរងផលប៉ះពាល់ខ្លាំងជាងគេគឺកុមារ ដែលមានអាយុពី៥ ទៅ ១៤ឆ្នាំ បន្ទាប់មកគឺក្រុម ១៥-២៤ឆ្នាំ។ ក្រសួងសុខាភិបាលសាធារណៈបានព្រមានថា ករណីជំងឺគ្រុនឈាម ដែលឆ្លងដោយសារមូសខ្លា តែងតែកើនឡើងនៅចន្លោះខែមិថុនា ដល់ខែសីហា ក្នុងរដូវវស្សា។ ក្រសួងបានណែនាំដល់សាធារណជនត្រូវការពារខ្លួនពីមូសខាំ ដោយប្រើថ្នាំបាញ់មូស ហើយសម្រាន្តក្រោមមុង។
សមាជិកក្នុងគ្រួសារក៏គួរតែតាមដានរោគសញ្ញាជាប្រចាំផងដែរ ដោយការតាមដានរោគសញ្ញាដំបូងដូចជា៖ គ្រុនក្តៅខ្លាំង ដែលមានរយៈពេលប្រហែល ២-៧ ថ្ងៃ ការឈឺសាច់ដុំ និងឈឺភ្នែកជាដើម។ លោកស្រី Traisuree បាននិយាយថា ប្រសិនបើសមាជិកគ្រួសារមានរោគសញ្ញាទាំងនេះ ពួកគេគួរតែទៅជួបគ្រូពេទ្យជាបន្ទាន់។ រដ្ឋាភិបាលបានជំរុញសាធារណជន និងអ្នកផ្សេងទៀត ចូលរួមយុទ្ធនាការបង្ការជំងឺគ្រុនឈាម ដោយការបំផ្លាញជម្រកមូសខ្លាក្នុងរដូវវស្សា។ ពលរដ្ឋត្រូវបានណែនាំឱ្យបង្ហូរទឹកចេញពីវត្ថុដែលដក់ទឹក ដើម្បីការពារមូសពីការបង្កាត់ពូជ៕
អត្ថបទ៖ លីដា
ប្រភព៖ The Nation Thailand