យ៉ាងហោចណាស់ ជនចំណាកស្រុកចំនួន ៧៩នាក់ បានលង់ទឹកស្លាប់ នៅពេលដែលទូកផ្ទុកលើសទម្ងន់មួយគ្រឿងបានលិចនៅក្នុងប្រទេសក្រិក។ រ៉យទ័រ និងសារព័ត៌មានផ្សេងទៀតរាយការណ៍ថា ទូកនេសាទមកពីប្រទេសលីប៊ី បានលិចនៅភាគអាគ្នេយ៍នៃប្រទេសក្រិកកាលពីថ្ងៃពុធ ហើយនៅ​លើ​ទូកមួយនោះ មានមនុស្ស​ពី ៥០០ នាក់ ទៅ ៧០០ នាក់​។ មនុស្សប្រហែល ១០០ នាក់ ត្រូវបានជួយសង្គ្រោះ និងបញ្ជូនទៅមន្ទីរពេទ្យនៅប្រទេសក្រិក។

ឆ្មាំឆ្នេរសមុទ្រក្រិកបាននិយាយថា ខ្លួនបានប្រទះឃើញទូកនេសាទកាលពីថ្ងៃអង្គារ ហើយបានស្នើផ្តល់ជំនួយ ប៉ុន្តែមនុស្សនៅលើទូកបានបដិសេធជំនួយ ហើយនិយាយថា ពួកគេចង់បន្តជិះទូកឆ្ពោះទៅប្រទេសអ៊ីតាលី។ ឆ្មាំឆ្នេរសមុទ្រនិយាយថា ទូកបានក្រឡាប់ និងលិចនៅមុនថ្ងៃរះនៅថ្ងៃពុធ បន្ទាប់ពីបានរាយការណ៍បញ្ហាម៉ាស៊ីន។ អង្គការអន្តរជាតិសម្រាប់ការធ្វើចំណាកស្រុកនិយាយថា មនុស្សជាង ២០,០០០ នាក់ បានស្លាប់ចាប់តាំងពីឆ្នាំ២០១៤ នៅលើផ្លូវមេឌីទែរ៉ាណេកណ្តាល ពីអាហ្វ្រិកខាងជើងទៅកាន់ប្រទេសអ៊ីតាលី៕

អត្ថបទ៖ លីដា
ប្រភព៖ NHK