កាលពីថ្ងៃសុក្រសប្ដាហ៍មុន រដ្ឋបាលរបស់លោក ចូ បៃដិន បានប្រកាសផ្តល់ជំនួយ ៩៣០ លានដុល្លារ ទៅដល់កម្មវិធី «Enabling Middle Mile Broadband Infrastructure Program» របស់នាយកដ្ឋានពាណិជ្ជកម្ម ដើម្បីគម្រោងពង្រីកការចូលប្រើប្រាស់អ៊ីនធឺណិតនៅតាមតំបន់ជនបទ។ ជំនួយនេះនឹងជួយដល់ការដាក់ពង្រាយខ្សែកាបអុបទិកថ្មីជាង ១២,០០០ ម៉ាយ នៅទូទាំងរដ្ឋចំនួន ៣៥ និង ព័រតូរីកូ។ រដ្ឋបាលរំពឹងថា អ្នកទទួលជំនួយនឹងវិនិយោគបន្ថែមចំនួន ៨៤៨.៤៦ លានដុល្លារ ដែលនឹងបង្កើនឥទ្ធិពលរបស់កម្មវិធីទ្វេដង។

នាយកដ្ឋានពាណិជ្ជកម្មបានឱ្យដឹងថា ខ្លួនបានទទួលពាក្យស្នើសុំជាង ២៦០ សម្រាប់កម្មវិធីជំនួយឥតសំណងរបស់ Middle Mile ដែលស្មើនឹងសំណើមូលនិធិ ៧.៤៧ ពាន់លានដុល្លារ។ ទីភ្នាក់ងារបានផ្តល់ជាជំនួយឥតសំណងដល់ក្រុមហ៊ុនទូរគមនាគមន៍ និងក្រុមហ៊ុនឧបករណ៍ដំឡើង ហើយក៏បានបែងចែកមូលនិធិសម្រាប់រដ្ឋាភិបាលកុលសម្ព័ន្ធ និងអង្គការមិនរកប្រាក់ចំណេញផងដែរ។ ជំនួយដ៏ធំបំផុតគឺមានតម្លៃ ៨៨.៨ លានដុល្លារ សម្រាប់រដ្ឋអាឡាស្កា ដែល ៥៥% នៃអ្នកស្រុកនៅទីនោះគ្មានអ៊ីនធឺណិតប្រើប្រាស់។ នាយកដ្ឋានពាណិជ្ជកម្មបានផ្តល់ប្រាក់ ២៦.៦ លានដុល្លារ ជាមធ្យមទៅដល់អ្នករៀបចំនីមួយៗ ហើយពួកគេមានពេល ៥ឆ្នាំ ដើម្បីបញ្ចប់ការងារលើគម្រោងនេះ ប៉ុន្តែរដ្ឋបាលសង្ឃឹមថា ការសាងសង់ជាច្រើននឹងត្រូវបញ្ចប់ក្នុងពេលឆាប់ៗនេះ៕

អត្ថបទ៖ លីដា
ប្រភព៖ Engadget