ឃើញឡានរអិលថយក្រោយ ខំរត់ទៅជាន់ហ្វ្រាំង បែរច្រឡំជាន់ហ្គែរ ស្ទុះទៅបុកមនុស្សផ្ទប់នឹងជញ្ជាំងស្លាប់ភ្លាមៗយ៉ាងរន្ធត់
ក្រុងព្រះសីហនុ- រថយន្តតាក់ស៊ីមួយគ្រឿតឈប់ដោះលេខច្រឡំដាក់ D ឡានរអិល ម្ចាស់ជាន់ហ្គែរច្រឡំហ្វ្រាំង ស្ទុះទៅបុកប្តីប្រពន្ធពីរនាក់ផ្ទប់ជញ្ជាំងផ្ទះ ស្លាប់ប្តី ប្រពន្ធរបួសធ្ងន់។ យោងតាមព័ត៌មានប្រចាំថ្ងៃរបស់ស្នងការដ្ឋាននគរបាល ខេត្តព្រះសីហនុ បានឲ្យដឹងថា ថ្ងៃទី០៥ ខែមីនា ឆ្នាំ២០១៩ វេលាម៉ោង ១៩:០០នាទី លើផ្លូវសេរីភាព ត្រង់ចំណុច មុខផ្ទះជាងជី ស្ថិតនៅក្នុងភូមិ២ សង្កាត់លេខ៤ ក្រុង/ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើង បង្កដោយ រថយន្ត ០១គ្រឿងម៉ាក HIGHLANDER ពណ៌ គយ ពាក់ផ្លាកលេខ ភ្នំពេញ 2AJ-1584 អ្នកបើកបរឈ្មោះ ធាំ រ៉េត ភេទប្រុស អាយុ ៤៧ឆ្នាំ មុខរបរ អ្នករត់តាក់ស៊ី មានទីលំនៅភូមិ៤ សង្កាត់លេខ៤ ក្រុង/ខេត្តព្រះសីហនុ មានទិសដៅដឹកភ្ញៀវពី ភ្នំពេញ ឆ្ពោះមក ខេត្តព្រះសីហនុ ពេលដាក់ភ្ញៀវចុះអស់ហើយ បានទៅផ្ទះជាងជី ដើម្បីប្តូរអំពូលភ្លើង លុះដល់ចំណុចខាងលើត្រៀមចេញពីរថយន្តដោយដាក់លេខ D រថយន្តក៏រអិលថយក្រោយ អ្នកបើកបរឃើញដូចនេះស្ទុះទៅជាន់ហ្រ្វាំងច្រឡំហ្គែរទៅមុខបុកនឹងម្ចាស់តូបចំនួន ០២នាក់ប្តីប្រពន្ធផ្ទប់នឹងជញ្ជាំងផ្ទះ ជនរងគ្រោះប្តីឈ្មោះ វ៉ន វាសនា ភេទ ប្រុស អាយុ ៣៣ឆ្នាំ មុខរបរ លក់ដូរ និងប្រពន្ធឈ្មោះ ទៀង ហុង ភេទ ស្រី អាយុ ៣៥ឆ្នាំ មុខរបរ លក់ដូរ មានទីលំនៅភូមិ២ សង្កាត់លេខ៤ ក្រុង/ខេត្តព្រះសីហនុ។
គ្រោះថ្នាក់នេះបណ្ដាលឲ្យឈ្មោះ វ៉ន វាសនា ស្លាប់នៅនឹងកន្លែងកើតហេតុបានប្រគល់ជូនទៅឲ្យក្រុមគ្រួសារយកទៅធ្វើបុណ្យតាមប្រពៃណី និងឈ្មោះ ទៀង ហុង រងរបួស ធ្ងន់ បានបញ្ជូនទៅសង្គ្រោះមន្ទីរពេទ្យបង្អែកខេត្តព្រះសីហនុ ។ ចំណែកអ្នកបើកបររថយន្តបាននាំខ្លួនមកកាន់ការិយាល័យនគរបាលចរាចរណ៍ផ្លូវគោក ។ រីឯវត្ថុតាង រថយន្ត ០១គ្រឿងបានយកមករក្សាទុកនៅការិយាល័យនគរបាលចរាចរណ៍ផ្លូវគោក ៕
ប្រភព៖ លោក Huy Bunleng