ជំងឺគ្រុនឈាមអាចនឹងផ្ទុះឡើងនៅក្នុងឆ្នាំនេះ ក្រសួងណែនាំមិនឲ្យប្រើថ្នាំប្រភេទនេះឡើយ ពេលក្តៅខ្លួនភ្លាមៗ
កាលពីពេលថ្មីៗនេះ ក្រសួងសុខាភិបាល បានចេញសេចក្តីក្រើនរំលឹកស្តីអំពី វិធានការការពារជំងឺគ្រុនឈាម ដើម្បីទប់ស្កាត់សភាពអាចផ្ទុះឡើងនូវជំងឺគ្រុនឈាមក្នុងឆ្នាំ២០១៩។ ជំងឺគ្រុនឈាម ជាជំងឺអាចកើតឡើងលើមនុស្សគ្រប់វ័យ ហើយរោគសញ្ញានៃជំងឺគ្រុនឈាមគឺ ២ ទៅ ៣ ថ្ងៃក្រោយពីមូសខ្លាញីខាំ អ្នកជំងឺមានក្ដៅខ្លួនពី ៣៩ ទៅ ៤០ អង្សាសេ អមដោយរោគសញ្ញាផ្សេងៗទៀតដូចជា មុខក្រហម ឈឺប្រឡង់កែវភ្នែកចាក់ទៅក្រោយ ឈឺក្បាល ចង់ក្អួត ឬក្អួត ឈឺពោះ ឈឺសាច់ដុំ ឈឺសន្លាក់ដៃជើង ស្នាមអុចៗក្រហមលើស្បែក ឬមានហូរឈាមតាមអញ្ចាញធ្មេញជាដើម។
ដើម្បីការពារ និងទប់ស្កាត់ការផ្ទុះឡើងនូវជំងឺគ្រុនឈាមក្នុងឆ្នាំ ២០១៩ នេះ ក្រសួងបានណែនាំវិធានការ ៣ ដូចខាងក្រោម ៖
វិធានការទី ១ ៖ ត្រូវកំចាត់ដង្កូវទឹកនៅតាមកន្លែងទឹកដក ឬ វត្ថុសម្រាប់ដាក់ទឹក ដូចជាពាងទឹក អាងទឹក ថូផ្កា ចានទ្រជើងតុទូ ក្រឡ ធុង ជាដើម ដោយមានការផ្លាស់ប្ដូរទឹក និងលាងសំអាតរបស់ទាំងនោះ ជាប់ជាប្រចាំយ៉ាងតិចមួយដងក្នុងមួយសប្តាហ៍ ឬ ត្រូវគ្របគំរបឲ្យបានជិតល្អ និងដាក់ថ្នាំអាបែតសម្លាប់ដង្កូវទឹក ឬ ចិញ្ចឹមកូនត្រី ៧ ពណ៌នៅកន្លែងអាចចិញ្ចឹមបាន។ សម្ភារៈដក់ទឹកដែលមិនប្រើ ត្រូវកប់ ឬ ដុត ឬទុកផ្កាប់កុំឲ្យមានដក់ទឹក។
វិធានការទី ២ ៖ អាជីវករ និងម្ចាស់អាជីវកម្មទាំងឡាយដែលប្រកបរបរពាក់ព័ន្ធសម្បកកង់ ត្រូវធ្វើការគ្រប់គ្រងសម្បកកង់ទាំងនោះឲ្យជៀសផុតពីការដក់ទឹក។
វិធានការទី ៣ ៖ ក្នុងករណីមានរោគសញ្ញាក្ដៅខ្លួនខ្លាំងភ្លាមៗជៀសវាងការប្រើប្រាស់ពពួកឱសថអាស្ពីរីន ហើយត្រូវប្រញាប់នាំអ្នកជំងឺទៅរកសេវាពិនិត្យ ដែលនៅជិតបំផុត (មិនឲ្យយឺតជាង ៧២ ម៉ោងបន្ទាប់ពីក្ដៅខ្លួន) ហើយកុំសាកល្បងព្យាបាលអ្នកជំងឺគ្រុនក្ដៅភ្លាមៗដោយខ្លួនឯង ឬពន្យារពេលតាមដានព្យាបាលជំងឺនៅសេវាឯកជនដែលគ្មានជំនាញច្បាស់លាស់ ព្រោះជំងឺគ្រុនឈាមអាចសម្លាប់អ្នកជំងឺបានគ្រប់ពេល។
ក្រៅពីវិធានការទាំង ៣ ខាងលើក្រសួងសុខាភិបាលក៏បានណែនាំឲ្យប្រើប្រាស់ថ្នាំបាញ់មូសជាញឹកញាប់ផងដែរ ដើម្បីកម្ចាត់ចោលមូសគ្រប់ប្រភេទផងដែរ៕
អត្ថបទ៖ សេម