រូបព្រះបដិមាប្រមាណជា៣០០ទៅ៤០០អង្គតម្កល់ទុកក្នុងវត្ដព្រែកហូរត្រូវជនមិនស្គាល់មុខលួចនៅក្រុងតាខ្មៅ
ខេត្តកណ្ដាល៖ រូបព្រះបដិមាប្រមាណជា៣០០ទៅ៤០០អង្គ កសាងអំពីស្ពាន់ ដែលតម្កល់ក្នុងវត្ដព្រែកហូរ ត្រូវជនមិនស្គាល់មុខលួច បង្កការភ្ញាក់ផ្អើលឡើងនៅថ្ងៃទី២៨ ខែមិនា ឆ្នាំ២០១៩ វេលាម៉ោង១៩និង១០នាទីត្រង់ចំណុចក្នុងវត្តព្រែកហូរ ស្ថិតក្នុងភូមិបត្តាជី១ សង្កាត់ព្រែកហូរ ក្រុងតាខ្មៅ ខេត្តកណ្តាល។ មន្រ្ដីនគរបាលក្រុងតាខ្មៅបានឲ្យដឹងថា រូបព្រះបដិមាដែលត្រូវជនមិនស្គាល់មុខលួចយកទៅនោះ មានប្រមាណជា៣០០ទៅ៤០០អង្គ កសាងអំពីស្ពាន់ ។ ចំណែកវត្ថុតាងដែលសមត្ថកិច្ចធ្វើការដកហូតមកវិញមានចំនួន២៦អង្គ ។
ប្រភពដដែលបន្ដថា តាមការបំភ្លឺរបស់គណៈកម្មការវត្ដបានឲ្យដឹងថា រូបព្រះបដិមាស ដែលនៅក្នុងវត្ដព្រែកហូរមានចំនួន៥០០០អង្គ ហើយរូបបដិមាខាងលើ ត្រូវបានគណៈកម្មការយកទៅតម្កល់ទុកនៅក្រោមបល្ល័ងព្រះ ក្នុងបរិវេណវត្ដព្រែកហូរអស់រយៈពេលជាយូរមកហើយ មិនដែលមានការបាត់បង់នោះទេ ។ លុះមកដល់ថ្ងៃទី២៨ ខែមិនា ឆ្នាំ២០១៩ វេលាម៉ោង១៩ ស្រាប់តែឈ្មោះ ខូវ ម៉េងហាក់ ហៅសាក់ បានយករូបបដិមាចំនួន២៦អង្គ ខាងលើនោះ មកប្រគល់ឲ្យឈ្មោះ មឿន វាសនា ជាកូនសិស្សលោក ទើបបង្កការភ្ញាក់ផ្អើលដល់គណៈកម្មការវត្ដ រួចបាននាំគ្នាមកមើលកន្លែងតម្កល់ទុករូបព្រះបដិមា ដោយសង្ស័យមានជនណាលួច ភ្លាមនោះក៏បានរាយការណ៍ជូនសមត្ថកិច្ចនគរបាលក្រុងតាខ្មៅ ដើម្បីមកធ្វើការពិនិត្យកន្លែងកើតហេតុ ។
បន្ទាប់ពីកម្លាំងសមត្ថកិច្ចនគរបាលក្រុងតាខ្មៅទទួលបានព័ត៌មានខាងលើ ភ្លាមនោះក៏ចុះមកធ្វើការពិនិត្យ រួមជាមួយគណះកម្មការ ព្រះសង្ឃគង់នៅក្នុងវត្ដ បាននាំគ្នារាប់មើលឃើញថា រូបព្រះបដិមា ត្រូវបានចោរលួចបាត់អស់ប្រមាណជា៣០០ទៅ៤០០អង្គ ។ ចំពោះករណីខាងលើនេះ កម្លាំងនគរបាលជំនាញកំពុងកសាងសំណុំរឿង ដើម្បីធ្វើការស្រាវជ្រាវ ស៊ើបអង្កេតរកមុខជនសង្ស័យមកចាត់ការតាមនីតិវិធីច្បាប់ ៕
ប្រភព៖ នាយកដ្ឋានផ្សព្វផ្សាយអប់រំ