ក្រុមសេះបង្កង់ Juventus គឺជាក្រុមដែលមានអ្នកគាំទ្រ និងរំពឹងថានឹងឈ្នះពានរង្វាន់ Champion League បន្ទាប់ពីចុះកុងត្រាជាមួយកីឡាករ Christiano Ronaldo នៅរដូវកាលក្តៅមុននេះ ប៉ុន្តែផ្ទុយទៅវិញអ្វីដែរពួកគេរំពឹងទុកត្រូវបានរលាយសូន្យឈឹង។ ទោះបីជាយ៉ាងណាក៏ដោយ Ronaldo បានជួយក្រុមសេះបង្កង់អោយឆ្លងផុតវគ្គ ១៦ក្រុមចុងក្រោយបន្ទាប់ពី Juventus បានចាញ់ក្រុម At. Madrid ក្នុងលទ្ធផល២ទល់នឹងសូន្យនៅក្នុងជើងទី១ ហើយរកបាន Hat-trick ជួយអោយក្រុម Juventus ឡើងទៅវគ្គ៨ក្រុមចុងក្រោយផងដែរ នៅពេលដែលស្វាគមន៍ក្រុមភ្ញៀវនៅក្នុងទឹកដីអុីតាលីនៅជើងទី២វិញ។

គួរបញ្ជាក់ផងដែរថានៅជើងទី១ក្នុងទឹកដី Amsterdam របស់ក្រុម Ajax បានបញ្ចប់លទ្ធផល ១ស្មើ ដោយ Ronaldo ជាអ្នកតែតបាល់បញ្ជូលទីនៅក្នុងចុងតង់ទី១។ ប៉ុន្តែគួរអោយសោកស្តាយ Ajax បានបញ្ឈប់ដំណើររបស់ Ronaldo បន្ទាប់ពីយកឈ្នះក្រុម Juventus នៅក្នុងលទ្ធផល ២ទល់នឹង១ ក្នុងទឹកដី Turin របស់Juventus។ ក្នុងចំណុចនេះគឺ Ronaldo មិនអាចស្វែងរកពាន Champion League ទី៦របស់ខ្លួន បន្ទាប់ពីគាត់សង្ឃឹមថានឹងអាចឈ្នះពាននេះនៅក្នុងទឹកដីប្រទេសអុីតាលី។ បន្ទាប់ពីបញ្ចប់ការប្រកួតជាមួយ Ajax កីឡាករ Ronaldo មានអារម្មណ៍មិនល្អ និងបានដើរចេញពីពហុកីឡាដ្ឋាន Turin ដោយមិនបានធ្វើបទសំភាសន៍អ្វីទាំងអស់។

ក្រោយមកម្តាយរបស់ Ronaldo បាននិយាយពីការសន្ទនារបស់គាត់ជាមួយ Ronaldo ប្រាប់ទៅកាសែត CalcioMarcato ថា ”អ្វីដែលគាត់បាននិយាយជាមួយខ្ញុំនោះគឺ ម៉ាក់កូនធ្វើមិនបានល្អទេ” ហើយពេលគាត់និយាយគឺមានអារម្មណ៍ថា គាត់បង្ហាញពីអារម្មណ៍របស់គាត់ខ្លាំងមែនទែន។ បន្ថែមពីនេះទៅទៀតគ្រូបង្វឹក Allegri បានទទួលស្គាល់ពីការខិតខំរបស់ Ronaldo នៅក្នុងការប្រកួតផងដែរ។ នេះពិតជាគួរអោយសោកស្តាយខ្លាំងមែនទែនសម្រាប់រូបគាត់ ហើយគាត់ពិតជាខំអស់សមត្ថភាពហើយ និងសង្ឃឹមថានៅរដូវកាលក្រោយគាត់នឹងអាចធ្វើបានសម្រេចនូវអ្វីដែលគាត់កំពុងប្រាថ្នា បើទោះបីជាគាត់មានអាយុច្រើនបន្តិចក៏ដោយ៕

អត្ថបទ៖ សុគុណា
ប្រភព៖ Givemesports