អាមេរិកនឹងគិតថ្លៃ “សេវាចាប់ខ្លួន” ចំនួន ៥,០០០ដុល្លារ ចំពោះពលរដ្ឋណាដែលចូលក្នុងទឹកដីអាមេរិកដោយខុសច្បាប់

អាមេរិក៖ សហរដ្ឋអាមេរិកបានចាប់ផ្តើមគិតថ្លៃសេវា ៥,០០០ដុល្លារ ចំពោះពលរដ្ឋណា ដែលចូលក្នុងទឹកដីអាមេរិកដោយខុសច្បាប់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី៦ ខែធ្នូ។ បើតាមលោក Michael Banks ប្រធានក្រុមល្បាតព្រំដែនអាមេរិកបានបញ្ជាក់ថា ការគិតថ្លៃសេវាខាងលើនេះ គឺជា “ថ្លៃចាប់ខ្លួន” ចំពោះជនអន្តោប្រវេសន៍ខុសច្បាប់ ដែលព្យាយាមចូលទៅរស់នៅក្នុងទឹកដីអាមេរិកដោយគ្មានអនុញ្ញាត។

ប្រភពខាងលើបានបន្តថា ការគិតថ្លៃសេវាជាទឹកប្រាក់ចំនួន ៥,០០០ដុល្លារនេះ​ នឹងអនុវត្តចំពោះជនអន្តោប្រវេសន៍ខុសច្បាប់ ដែលមានអាយុចាប់ពី ១៤ឆ្នាំឡើងទៅ និងអនុវត្តចំពោះក្រុមអន្តោប្រវេសន៍ ដែលបានមករស់នៅក្នុងសហរដ្ឋអាមេរិកជាយូរឆ្នាំមកហើយផងដែរ។ គួរកត់សម្គាល់ថា ចាប់តាំងពីលោក ដូណាល់ ត្រាំ ចូលកាន់តំណែងជាប្រធានាធិបតីអាមេរិកមក អាជ្ញាធរអាមេរិកបានអនុវត្តច្បាប់យ៉ាងតឹងរឹងបំផុតចំពោះក្រុមជនអន្តោប្រវេសន៍ខុសច្បាប់​ ហើយកាលពីដើមឆ្នាំនេះលោក ដូណាល់ ត្រាំ ធ្លាប់គំរាមអនុវត្តច្បាប់ពិន័យជនអន្តោប្រវេសន៍ណា ដែលស្ថិតក្នុងបទបញ្ជានិរទេសខ្លួនហើយ តែមិនព្រមចេញពីអាមេរិក ជាប្រាក់ចំនួន ១,០០០ដុល្លារក្នុងមួយថ្ងៃនៃការស្នាក់ក្នុងអាមេរិកទៀតផង៕

អត្ថបទ៖ ភក្តី

ប្រភព៖ The Strait Time