ជប៉ុន៖ យ៉ាងហោចណាស់មានមនុស្សចំនួន ២នាក់បានស្លាប់បាត់បង់ជីវិតនៅក្នុងហេតុការណ៍មានភ្លើងឆេះបន្ទប់សូណា (Sauna) ឯកជនមួយកន្លែងនៅក្នុងប្រទេសជប៉ុន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី១៧ ខែធ្នូ។ បន្ទប់សូណាដែលជាកន្លែងកើតហេតុនេះគឺជាផ្នែកមួយរបស់ហាង Saunatiger មានទីតាំងស្ថិតនៅក្នុងសង្កាត់​ Akasaka នៃទីក្រុងតូក្យូ។

ប្រភពខាងលើបានបន្តថា ជនរងគ្រោះដែលបានស្លាប់បាត់បង់ជីវិតទាំង ២រូបនេះ រួមមាន លោក Masanari Matsuda អាយុ ៣៦ឆ្នាំ និងម្នាក់ទៀតជាប្រពន្ធរបស់គាត់ មានឈ្មោះថា Yoko និងមានអាយុ ៣៧ឆ្នាំ។ បើតាមអាជ្ញាធរជប៉ុនបានបញ្ជាក់ថា ប្តីប្រពន្ធទាំង ២នេះ គឺជាម្ចាស់ហាង Saunatiger ដែលជាកន្លែងកើតហេតុខាងលើនេះផ្ទាល់តែម្តង ដោយស្រ្តីជាប្រពន្ធគឺជាអ្នកជំនាញផ្នែកកាត់ក្រចក និងបុរសជាប្តីជាអ្នកគ្រប់គ្រងទូទៅ។​ រហូតមកទល់នឹងពេលនេះ គេនៅមិនទាន់ដឹងពីមូលហេតុជាក់លាក់ ដែលបណ្តាលឱ្យអគ្គិភ័យខាងលើនេះនៅឡើយទេ៕

អត្ថបទ៖ ភក្តី

ប្រភព៖ The Strait Time