លោក ដូណាល់ ត្រាំ ព្រមានដំឡើងពន្ធចំពោះប្រទេស ដែលមិនគាំទ្រលោកក្នុងផែនការទិញយកកោះហ្គ្រីនឡែន
អាមេរិក៖ លោកប្រធានាធិបតីអាមេរិក ដូណាល់ ត្រាំ បានព្រមានដំឡើងពន្ធចំពោះប្រទេសទាំងឡាយណា ដែលមិនគាំទ្រលោកក្នុងផែនការទិញយកកោះហ្គ្រីនឡែន (Greenland) នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី១៧ ខែមករា។ ការព្រមាននេះត្រូវបានធ្វើឡើងស្របពេលដែលសមាជិកសភាអាមេរិកមួយចំនួនកំពុងធ្វើដំណើរទស្សនកិច្ចទៅកាន់ទីក្រុង Copenhagen ដើម្បីផ្តល់ការគាំទ្រដល់ប្រទេសដាណឺម៉ាក។
ថ្លែងនៅក្នុងសេតវិមាន លោក ដូណាល់ ត្រាំ បានទទូចជាថ្មីម្តងទៀតថា សហរដ្ឋអាមេរិកត្រូវការកោះហ្គ្រីនឡែនដែលសម្បូរទៅដោយរ៉ែសម្រាប់ «សន្តិសុខជាតិអាមេរិក» ហើយលោក «អាចនឹងដាក់ពន្ធ» លើប្រទេសណាដែលប្រឆាំងនឹងជំហរនោះ។ គួររម្លឹកជូនថា កាលពីសប្តាហ៍មុន រដ្ឋបាលរបស់លោក ដូណាល់ ត្រាំ បានបង្ហាញពីគម្រោងផ្តល់ប្រាក់ឧបត្ថម្ភដល់ពលរដ្ឋនៅលើកោះហ្គ្រីនឡែនក្នុងម្នាក់រហូតដល់ ១០០,០០០ ដុល្លារ ប្រសិនបើពួកគេយល់ព្រមផ្តាច់ខ្លួនចេញពីប្រទេសដាណឺម៉ាក ហើយងាកមកចូលរួមជាមួយសហរដ្ឋអាមេរិក៕
អត្ថបទ៖ ភក្តី
ប្រភព៖ Channel News Asia