ទិញដីមួយឡានគ្រាន់ចាក់បំពេញបរិវេណផ្ទះ តែមានថែមជូនគ្រាប់មីនមកជាមួយ

កាលពីពេលថ្មីៗនេះមានករណីមួយគួរឲ្យភ្ញាក់ផ្អើល ដោយស្ត្រីម្នាក់បានទិញដីមួយឡាន គ្រាន់តែយកមកចាក់បំពេញដីបរិវេណគេហដ្ឋានរបស់ខ្លួន ក៏ស្រាប់តែពេលកំពុងកាយក៏ប្រទះឃើញគ្រាប់មីន អ្នកស្រីក៏បានហៅអង្គភាពស៊ីម៉ាក់មកពិនិត្យនិងរំដោះគ្រាប់មីនចេញ។

នេះបើយោងតាមការបង្ហោះរបស់លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា បានសរសេរយ៉ាងដូច្នេះថា៖ “នៅខេត្តប៉ៃលិន ថ្ងៃទី២៥​ ខែមិថុនា​ ២០១៩នេះ! នាំគ្រាប់មីនដល់ផ្ទះ!
ស្ត្រី៖​ ពូសុីម៉ាក់ខ្ញុំទិញ​តែដីទេ​ ខ្ញុំមិនទិញគ្រាប់មីនទេ​ព្រោះខ្ញុំដឹងថាខុសច្បាប់!
មន្ត្រីសុីម៉ាក់៖​ ទិញដីកន្លែងណា​ មានប្លង់ទេ​ ខ្ញុំឆែកមេីលផែនទីសិនក្រែងប៉ះចំលេី​ ចំការមីន!
ស្ត្រី៖​ មិនមែនអ៊ីចឹងទេពូសុីម៉ាក! ខ្ញុំ​ទិញដីមួយឡានចាក់បំពេញដីក្នុងផ្ទះហ្នឹងណា​ តែមានគ្រាប់មីននៅពេលកាយដីឡាននោះមកចាក់ផ្ទះ! មកពូសុីម៉ាក់ឯង​ មកមេីលគ្រាប់មីនជាក់ស្តែងហ្នមក​ ស្រួលយល់គ្នា!
មន្ត្រីសុីម៉ាក់៖​ សំណាងមួយក្នុងតែ១មុឺនគ្រោះថ្នាក់!
ស្ត្រី៖​ ខ្ញុំសំណាងអ៊ឺចឹងកាយជិតត្រូវគ្រាប់មីន!​ ហេីយថ្ងៃស្អែកនឹងនាំសមាជិកគ្រួសារទាំងអស់ទៅស្រោចទឹកឱយបាន៧វត្ត”៕

ដោយ៖ ណារ៉ែន