YouTuber ល្បីឈ្មោះមួយរូប កំពុងដឹកនាំការរៃអង្គាសប្រាក់ដ៏ធំបំផុតនៅក្នុង YouTube ដើម្បីដាំដើមឈើឱ្យបាន ២០លានដើម

លោក Jimmy ‘Mr.Beast’ Donaldson ដែលជា YouTuber ដ៏ពេញនិយមសម្រាប់សកម្មភាពសប្បុរសធម៌របស់គាត់ ពេលនេះកំពុងដឹកនាំការរៃអង្គាសប្រាក់ដ៏ធំបំផុតនៅក្នុង YouTube ដើម្បីចូលរួមដាំដើមឈើឱ្យបាន ២០លានដើម។ ក្នុងនោះផងដែរអ្នកល្បីឈ្មោះនៅលើ YouTube រួមមាន៖ Mark Rober, Rhett & Link, Marshmello, iJustine, Marques Brownlee, The Slow Mo Guys, Ninja, Simone Giertz, Jacksepticeye, Smarter Every Day និងជាច្រើនទៀត ក៏កំពុងគាំទ្របុព្វហេតុនេះតាមរយៈបណ្តាញរបស់ពួកគេផងដែរ។

គំនិតផ្តួចផ្តើមនេះបានចាប់ផ្តើមនៅខែឧសភា ឆ្នាំ២០១៩ នៅពេលដែលអ្នកគាំទ្ររបស់ Donaldson ឬ Mr.Beast ជាច្រើននៅលើបណ្ដាញ YouTube, Reddit និង Twitter បានស្នើឱ្យគាត់ដាំដើមឈើឱ្យបាន ២០លានដើម ដើម្បីអបអរសាទរដល់ការទទួលបាន ២០លាន subscribers របស់គាត់។ Donaldson តែងតែជួបប្រទះនូវបញ្ហាប្រឈមបែបនេះក្នុងអាជីពរបស់គាត់ ហើយបានទទួលយកភារកិច្ចនេះភ្លាមៗ។ គាត់ រួមជាមួយមិត្តភក្តិរបស់គាត់ ក៏ព្យាយាមមើលថាតើពួកគេអាចដាំបានប៉ុន្មានដើមក្នុងមួយថ្ងៃ ប៉ុន្តែគឺបានតែ ៣០០ដើមប៉ុណ្ណោះ។ ដូច្នេះដើម្បីបំពេញការងារនេះ Mr.Beast បានបង្កើតការរៃអង្គាសប្រាក់ដ៏ធំបំផុតនៅក្នុង YouTube ដើម្បីឱ្យអ្នកគាំទ្រគាត់ជួយគាត់។

វិធីគឺងាយៗហើយត្រង់ៗ ដោយ Mr.Beast នឹងបង្ហោះវីដេអូពីពេលនេះតទៅជាមួយនឹងហាស់ថែក #TeamTrees ដើម្បីសុំរៃការរៃអង្គាសប្រាក់ ហើយខាង YouTube ក៏សន្យារ៉ាប់រងរាល់ថ្លៃប្រតិបត្តិការសម្រាប់ការបរិច្ចាគផងដែរ។ ធ្វើបែបនេះ Mr.Beast អាចយកមូលនិធិទាំងនោះប្រគល់ឱ្យអង្គការ Arbor Day Foundation ដែលជាដៃគូ ដែលមានន័យថា ១ដុល្លារ = ដើមឈើ ១ដើម ព្រោះកម្លាំងរបស់ពួកគេទាំងប៉ុណ្ណឹងនាក់មិនអាចដាំបានទាំង ២០លានដើមនោះទេ។ Mr.Beast ក៏រងការរិះគន់ដែរចំពោះបញ្ហានេះ ដោយគេនិយាយថាដើមឈើប៉ុណ្ណឹងវាមិនអាចទប់ការប្រែប្រួលអាកាសធាតុនោះទេ។ ប៉ុន្តែ Mr.Beast បាននិយាយថា ២០លានដើមគឺគ្រាន់បើជាង ០ ព្រោះដោយសារតែយើងមិនធ្វើអ្វីសោះនេះហើយ ទើបយើងជួបបញ្ហានេះ៕

អត្ថបទ៖ លីដា