អ្នកនាំពាក្យចិនម្នាក់និយាយថា ទីក្រុងប៉េកាំងបានព្រមព្រៀងជាមួយសហរដ្ឋអាមេរិក ក្នុងការកាត់បន្ថយពន្ធដាក់ទណ្ឌកម្មមួយចំនួនលើទំនិញគ្នាទៅវិញទៅមក ដែលជាផ្នែកមួយនៃកិច្ចព្រមព្រៀងពាណិជ្ជកម្មដំបូង។ អ្នកនាំពាក្យក្រសួងពាណិជ្ជកម្មចិនលោក Gao Feng បាននិយាយកាលពីថ្ងៃព្រហស្បតិ៍ថា៖ “ប្រទេសចិន និងសហរដ្ឋអាមេរិកបានព្រមព្រៀងគ្នាលុបចោលជាបណ្តើរៗនូវពន្ធគយ ដែលត្រូវបានដាក់ក្នុងពេលប្រឈមមុខនឹងពាណិជ្ជកម្ម”។ លោក Gao បានសង្កត់ធ្ងន់ថា ការកាត់បន្ថយសមភាពដែលបានធ្វើឡើងក្នុងពេលតែមួយដោយភាគីទាំងពីរ នឹងក្លាយជាលក្ខខណ្ឌដ៏សំខាន់មួយដើម្បីសម្រេចបាននូវកិច្ចព្រមព្រៀង។

មន្រ្តីនៃភាគីទាំងសងខាងកំពុងត្រៀមសម្រាប់កិច្ចពិភាក្សាថ្នាក់ប្រធានាធិបតីរវាងលោក ដូណាល់ ត្រាំ និងលោក ស៊ី ជីនពីង ក៏ដូចជាការចុះហត្ថលេខាជាផ្លូវការនៃកិច្ចព្រមព្រៀងមួយផ្នែកនោះ។ យ៉ាងណាក៏ដោយសហរដ្ឋអាមេរិកមិនទាន់ឆ្លើយតបនឹងការប្រកាសចុងក្រោយរបស់ទីក្រុងប៉េកាំងនៅឡើយទេ។ សារព័ត៌មានរ៉យទ័របានដកស្រង់ប្រភពព័ត៌មានដែលនិយាយថា ទីក្រុងវ៉ាស៊ីនតោននៅតែមិនទាន់ធ្វើការសម្រេចចិត្តចុងក្រោយ។ តម្លៃភាគហ៊ុននៅ Wall Street បានកើនឡើងកាលពីថ្ងៃព្រហស្បតិ៍ ដោយសារការរំពឹងទុកនៃការរីកចម្រើនគួរឱ្យកត់សម្គាល់នៅក្នុងកិច្ចពិភាក្សាពាណិជ្ជកម្ម ខណៈមធ្យមភាគឧស្សាហកម្ម Dow Jones បានបញ្ចប់នៅកំណត់ត្រាខ្ពស់៕

អត្ថបទ៖ លីដា