គ្រូបង្រៀនវៀតណាមម្នាក់ត្រូវជាប់គុក ១១ ឆ្នាំ ក្រោយបង្ហោះសារតាម Facebook ប្រឆាំងនឹងរដ្ឋាភិបាល

វៀតណាម៖ គ្រូបង្រៀនផ្នែកតន្ត្រីជនជាតិវៀតណាមម្នាក់ត្រូវបានតុលាការសម្រេចផ្តន្ទាទោសកាលពីពេលថ្មីៗនេះឲ្យជាប់គុករយៈពេល ១១ ឆ្នាំ​ ក្រោយគណនី Facebook របស់គាត់បានបង្ហោះនូវព័ត៌មានជាច្រើន ដែលមានទំនោរប្រឆាំងនឹងរដ្ឋាភិបាលរៀតណាម។​ គ្រូបង្រៀនដែលត្រូវបានគេចាប់ខ្លួននេះមានឈ្មោះថា Nguyen Nang Tinh អាយុ ៤៣ ឆ្នាំ​ រស់នៅក្នុងខេត្ត Nghe An ភាគខាងជើងប្រទេសវៀតណាម។ យោងតាមសារព័ត៌មាន Bangkokpost បានបញ្ជាក់ថា ក្រោយតាមដានទៅលើគណនី Facebook របស់លោក Nguyen Nang Tinh យ៉ាងល្អិតល្អន់ តុលាការ វៀតណាមបានសម្រេចធ្វើការផ្ដន្ទាទោសគាត់ពីបទ “បង្កើតនិងចែកចាយព័ត៌មាននិងមធ្យោបាយផ្សេងៗប្រឆាំងនឹងរដ្ឋាភិបាលវៀតណាម” ។

យ៉ាងណាក្តី លោក Nguyen Nang Tinh បានប្រាប់អ្នកសារព័ត៌មានថា គណនី Facebook ដែលបានចែកចាយព័ត៌មានប្រឆាំងរដ្ឋាភិបាលនោះមិនមែនជាគណនីពិតដែលគាត់ប្រើប្រាស់ឡើយ តែវាត្រូវបាន​បង្កើតដោយអ្នកផ្សេង និងយកឈ្មោះនិងរូបគាត់ទៅប្រើប្រាស់តែប៉ុណ្ណោះ។ ​សូមបញ្ជាក់ជូនថា រដ្ឋាភិបាល វៀតណាមមានការរឹតបន្ដឹងទៅលើការចែកចាយព័ត៌មានរិះគន់រដ្ឋាភិបាលយ៉ាងខ្លាំង ហើយកាលពីខែមុននេះក៏មានអ្នកប្រើប្រាស់បណ្ដាញសង្គមវៀតណាមត្រូវបានតុលាការសម្រេចឲ្យជាប់គុក ១២ ខែដែរ ក្រោយរូបគេបង្ហោះនូវសារបែបរិះគន់រដ្ឋាភិបាល៕

អត្ថបទ៖ភក្តី