ការស្ទង់មតិថ្មីមួយបានបង្ហាញថា ក្មេងជំទង់ចង់បាន AirPods, Nike និង Louis Vuitton ជាអំណោយថ្ងៃបុណ្យណូអែល

យោងតាមការស្ទង់មតិរបស់ Piper Jaffray បានឱ្យដឹងថា Apple, Nike និង Louis Vuitton ស្ថិតនៅលំដាប់កំពូលនៃបញ្ជីបំណងប៉ងចង់បានអំណោយរបស់ក្មេងជំទង់ នៅក្នុងឱកាសថ្ងៃបុណ្យណូអែលខាងមុននេះ។ Piper Jaffray ដែលជាក្រុមហ៊ុនធនាគារវិនិយោគឯករាជ្យមួយនេះ បានស្ទាបស្ទង់មតិអតិថិជនអាមេរិកជាង ១,០០០នាក់ ដែលមានអាយុពី ១៨ ទៅ ៦៥ឆ្នាំ។ បន្ទាប់ពីការវិភាគចម្លើយពីក្រុមក្មេងជំទង់ដែលមានប្រាក់ចំណូលខ្ពស់ Piper Jaffray បានរកឃើញថា Apple គឺជា “យីហោនៅកំពូលតារាង សម្រាប់វ័យជំទង់” ជាមួយនឹងកាស AirPods ដែលជាផលិតផល ដែលសម្បូរអ្នកចង់បានបំផុត។

ចំណែក Nike គឺជាម៉ាកដែលគេប៉ងចង់បានច្រើនជាងគេទី២ ខណៈផលិតផលពី Louis Vuitton បានជាប់លេខ៣។ យ៉ាងណាក៏ដោយថ្វីបើយីហោទាំង៣ ឈរនៅលំដាប់កំពូលពិតមែន ប៉ុន្តែអ្នកឈ្នះធំជាងគេបំផុតគឺក្រុមហ៊ុន Amazon ទោះបីគ្មានឈ្មោះក្នុងបញ្ជីក្ដី។ ការស្ទង់មតិក៏បានរកឃើញថា អតិថិជនច្បាស់ណាស់ថា នឹងធ្វើការទិញរបស់ពួកគេរហូតដល់ទៅ ៤៦% តាមរយៈទីផ្សារអនឡាញ។ ចុះអ្នកទាំងអស់គ្នាមានបំណងចង់បានអ្វីជាអំណោយដែរ?

អត្ថបទ៖ លីដា