អាជ្ញាធរទីក្រុងបាងកកមានគម្រោងចង់ដកភេសជ្ជៈមានជាតិស្ករចេញពីសាលារៀន ដើម្បីឱ្យក្មេងៗគេចផុតពីហានិភ័យនៃជំងឺទឹកនោមផ្អែម និងធាត់លើសទម្ងន់

រដ្ឋបាលក្រុងបាងកក (BMA) និយាយថា ខ្លួនកំពុងធ្វើការយ៉ាងយកចិត្តទុកដាក់ ដើម្បីធ្វើឱ្យសាលារៀននានាក្នុងក្រុងបាងកកទាំងអស់គ្មានជាតិសូដា (ភេសជ្ជៈមានជាតិស្ករ) ។ កាសែត The Nation រាយការណ៍ថា លេខាធិការអចិន្រ្តៃយ៍របស់ BMA កំពុងពិគ្រោះយោបល់ជាមួយការិយាល័យក្រុង និងស្រុក ក្នុងកិច្ចខិតខំប្រឹងប្រែងដើម្បីលើកកម្ពស់សុខភាពរបស់កុមារនៅក្នុងទីក្រុង និងការពារពួកគេពីហានិភ័យនៃជំងឺទឹកនោមផ្អែមពីការផឹកទឹក និងភេសជ្ជៈដែលមានជាតិស្ករច្រើនពេក។ យោងតាមការសិក្សារបស់គ្លីនិកព្យាបាលរោគកុមារនៃមន្ទីរពេទ្យជូឡាឡុងកន សមាមាត្រនៃជំងឺទឹកនោមផ្អែមប្រភេទ ២ ក្នុងយុវវ័យ ដែលមានអាយុពី ១០ ទៅ ១៩ឆ្នាំ បានកើនឡើងពី ១៣% ក្នុងចន្លោះឆ្នាំ២០០២ ដល់ ២០០៧ និងរហូតដល់ដល់ ២៧% ក្នុងចន្លោះឆ្នាំ២០០៨ ដល់ឆ្នាំ ២០១៩នេះ។

BMA កំពុងសហការជាមួយសាលារៀននៅតំបន់ក្នុងទីក្រុងបាងកក ដើម្បីបញ្ឈប់ការលក់សូដា និងភេសជ្ជៈនៅហាងកាហ្វេក្នុងសាលា ក៏ដូចជារៀបចំបញ្ជីអាហារថ្ងៃត្រង់ដែលមានសុខភាពល្អ និងលើកកម្ពស់ការធ្វើលំហាត់ប្រាណក្នុងចំណោមសិស្ស ដើម្បីកាត់បន្ថយបញ្ហាលើសទម្ងន់ និងបញ្ហាសុខភាព។ ផែនការនេះគឺសម្រាប់បុគ្គលិកមកពីការិយាល័យក្រុងធ្វើការជាមួយគ្រូ ដើម្បីពិនិត្យមើលថាតើមានអ្វីដែលត្រូវបានលក់ទៅឱ្យកុមារពីតូបអាហារក្នុងស្រុក និងធានាថា វាមានសុវត្ថិភាព និងសុខភាពល្អ។ ពួកគេក៏បានរៀបចំគោលការណ៍ណែនាំប្រឆាំងនឹងភាពធាត់ និងកង្វះអាហារូបត្ថម្ភ ដែលត្រូវចែកចាយដល់សាលារៀន និងមជ្ឈមណ្ឌលសេវាកម្មសុខភាពសាធារណៈចំនួន ៦៨កន្លែង នៅទីក្រុងបាងកក ដើម្បីលើកកម្ពស់ការយល់ដឹងជាសាធារណៈ និងទម្លាប់សុខភាពល្អក្នុងចំណោមកុមារ និងមនុស្សពេញវ័យ។ គំនិតផ្តួចផ្តើមនេះគឺជាផ្នែកមួយនៃយុទ្ធនាការរបស់ BMA ដើម្បីលើកកម្ពស់គុណភាពជីវិតរបស់កុមារ និងក្មេងជំទង់ក្រោមការឧបត្ថម្ភរបស់ព្រះមហាក្សត្រិយ៍មហាចក្រីសិរិនថន៕

អត្ថបទ៖ លីដា