តាមសម្ដីរបស់លោក Steve Muth មកពីរដ្ឋ Michigan ដែលបានធ្វើដំណើរជាមួយគ្រួសាររួមគ្នាលើនាវា Westerdam បានមានការសង្ស័យផ្ទាល់ខ្លួន អំពីលទ្ធផលការធ្វើតេស្តលើស្ត្រីអាមេរិកម្នាក់នោះ។ លោកបាននិយាយតាមអ៊ីមែលទៅកាន់ USA TODAY កាលពីថ្ងៃសុក្រថា៖ “ខ្ញុំគិតថាមនុស្សជាច្រើនរួមទាំងរូបខ្ញុំផងដែរ មានការសង្ស័យយ៉ាងខ្លាំងចំពោះលទ្ធផលតេស្តដំបូង ដែលបង្ហាញថាគាត់មានភាពវិជ្ជមានជាមួយវីរុស”។ គាត់បន្ថែមថា៖ “លទ្ធផលតេស្តវិជ្ជមានមិនពិតនេះ បានបណ្តាលឱ្យមានការខូចខាតដល់អ្នកដំណើររាប់រយនាក់ ដែលគ្មានកំហុសនៅលើ Westerdam ហើយត្រូវបានគេបដិសេធមិនឱ្យពួកគេហោះហើរត្រឡប់មកផ្ទះវិញ”។

ការខូចខាតមួយចំនួនទៀតគឺហិរញ្ញវត្ថុ នេះបើតាមសម្ដីអ្នកនាង Elly Chybowski ដែលធ្វើដំណើរនៅលើ Westerdam ជាមួយប្តីរបស់នាងឈ្មោះ Timothy ដែលត្រូវបានធ្វើដំណើរមកផ្ទះវិញ តាមជើងហោះហើរពីប្រទេសកម្ពុជាឆ្លងកាត់ទីក្រុងតូក្យូ និងទីក្រុង Dallas/Fort Worth ទៅផ្ទះរបស់ពួកគេនៅ Madison រដ្ឋ Wisconsin សហរដ្ឋអាមេរិក។ អ្នកនាងបានប្រាប់ USA TODAY តាមអ៊ីមែលថា៖ “ប្រហែលជា ២ម៉ោង មុនពេលហោះហើរពី (តូក្យូ) ទៅទីក្រុងដាឡាស សំបុត្ររបស់យើងត្រូវបានគេលុបចោលវិញដោយមិនដឹងមូលហេតុ”។ ដោយភ័យស្លន់ស្លោ និងមិនអាចទទួលបានចម្លើយ ប្តីប្រពន្ធទាំង ២នាក់នេះ បានកក់សំបុត្រយន្តហោះវិញ ដោយបានចំណាយអស់ពីហោប៉ៅ សរុបបាន ៥,១៣០ដុល្លារ។ ហើយពួកគេបានមកដល់ផ្ទះកាលពីថ្ងៃពុធ។

អ្នកនាង Elly Chybowski បានសរសេរនៅថ្ងៃសុក្រនេះថា ពេលមកដល់ផ្ទះវិញពួកគេត្រូវបានទាក់ទងដោយមន្ទីរសុខភាពសាធារណៈក្នុងតំបន់ ដោយសារថាពួកគាត់ជាអ្នករួមដំណើរជាមួយស្ត្រីម្នាក់ ដែលខាងម៉ាឡេស៊ីនិយាយថាមានវីរុស។ ដោយសារវាត្រូវបានគេចាត់ទុកថាជា “ការប្រឈមនឹងហានិភ័យមធ្យម” គូស្វាមីភរិយានេះត្រូវបានគេដាក់តាមដានរហូតដល់ថ្ងៃទី២៧ ខែកុម្ភៈ ដើម្បីកាត់បន្ថយលទ្ធភាពឆ្លង។ ដូច្នេះហើយវាធ្វើឱ្យប្តីរបស់អ្នកនាងមិនអាចវិលត្រឡប់ទៅធ្វើការវិញទេ ហើយកូនរបស់ពួកគេជាអ្នកយកអាហារឱ្យពួកគេបរិភោគ។ អ្នកនាង Chybowski បានសង្កត់ធ្ងន់ថា៖ “ការរំខានដល់ជីវិតរបស់មនុស្សជាច្រើន គឺវាគួរឱ្យខ្លាចណាស់។ ភាពតានតឹងផ្លូវចិត្តចំពោះយើងទាំងអស់គ្នា នៅក្នុងពេលមានភាពមិនប្រាកដប្រជា មុនពេលដែលយើងបានមកដល់ផ្ទះវិញ គឺមិនអាចវាស់វែងបានទេ”៕

អត្ថបទ៖ លីដា
ប្រភព៖ usatoday