រដ្ឋមន្ត្រីក្រសួងហិរញ្ញវត្ថុអាឡឺម៉ង់បានសម្លាប់ខ្លួន ព្រោះតែស្រ្តេសនឹងបញ្ហាសេដ្ឋកិច្ចជាតិ ដែលបង្កឡើងដោយមេរោគកូវីដ ១៩ខ្លាំងពេក

អាឡឺម៉ង់៖ យោងតាមការចុះផ្សាយលើសារព័ត៌មាន aljazeera បានឲ្យដឹងថា រដ្ឋមន្ត្រីក្រសួងហិរញ្ញវត្ថុប្រចាំនៅក្នុងរដ្ឋ​ Hesse ប្រទេសអាឡឺម៉ង់ បានសម្លាប់ខ្លួនឯងព្រោះតែលោកស្រ្តេសខ្លាំងពេកចំពោះបញ្ហាសេដ្ឋកិច្ចជាតិ ដែលបង្កឡើងដោយសារតែការរីករាលនៃមេរោគកូវីដ ១៩។ រដ្ឋមន្ត្រីក្រសួងវហិរញ្ញវត្ថុរូបនេះមានឈ្មោះថា Thomas Schaefer អាយុ ៥៤ឆ្នាំ មានប្រពន្ធនិងកូនចំនួន ២នាក់ផងដែរ។ ប្រភពខាងលើបានបន្តថា សាកសពរបស់លោក Thomas Schaefer ត្រូវបានគេប្រទះឃើញនៅក្បែរស្ថានីយ៍រថភ្លើងមួយកន្លែង ហើយតាមការពិនិត្យសាកសពគេអាចសន្និដ្ឋានបានថា វាគឺជាករណីធ្វើអត្តឃាត។

ក្នុងរយៈពេល ១០ ថ្ងៃចុងក្រោយនេះ សេដ្ឋកិច្ចរបស់អាឡឺម៉ង់ត្រូវបានគេមើលឃើញថា កាន់តែមានបញ្ហាចាក់ស្រេះធ្ងន់ធ្ងរឡើងៗ ហើយនៅតាមបណ្តាញសារព័ត៌មានវិញគេបានឃើញលោក Thomas Schaefer តែងបង្ហាញខ្លួនជាញឹកញាប់ ដើម្បីបង្ហាញពីវិធានការបន្ទាន់ផ្សេងៗចំពោះបញ្ហា ដែលពិបាកដោះស្រាយ ខណៈគេបានសង្កេតឃើញថា លោកតែងមានឥរិយាបថព្រួយបារម្ភ​ និងខ្វល់ខ្វាយជាខ្លាំង។ ព្រោះតែបញ្ហាស្រេ្តសលើសកម្រិតនេះហើយ ទើបជំរុញឲ្យលោក Thomas Schaefer សម្រេចធ្វើអត្តឃាតតែម្តង។ សូមបញ្ជាក់ថា គិតមកទល់នឹងពេលនេះអាឡឺម៉ង់មានអ្នកឆ្លងមេរោគកូវីដចំនួន ៦២ ៤៣៥ ករណី និងស្លាប់ ៥៤១ ករណីផងដែរ៕

អត្ថបទ៖ ភក្តី
ប្រភព៖ aljazeera